ខេត្តកំពត៖ ប្រជាពលរដ្ឋរស់នៅស្រុកកំពង់ត្រាច ខេត្តកំពត កំពុងតែមិនសប្បាយចិត្ត នឹងអាជ្ញាធរមិនខ្វាយខ្វល់បង្រ្កាបសង្វៀនជល់មាន់ បៀ អាប៉ោង យូគី នៅផ្សារ តន់ហន់ ភូមិព្រែកក្រឹសបណ្តាលឲ្យប៉ះពាល់ដល់ កេរ្តិ៏ឈ្មោះថ្នាក់ដឹកនាំគណបក្សប្រជាជនដែលខិតខំកសាងប្រទេសឲ្យរីកចំរើន លើកតំកើងជីវភាពប្រជាពលរដ្ឋ តែបែរជាអាជ្ញាធរខេត្តកំពតបណ្តោយឲ្យមានសង្វៀនជល់មាន់ ល្បែងស៊ីសងដុះស្លែនៅភូមិព្រែកក្រឹស បំផ្លាញការរីកចំរើនរបស់ប្រជាពលរដ្ឋទៅវិញ។
ប្រជាពលរដ្ឋបានឲ្យដឹងថាសង្វៀនជល់មាន់ បៀ អាប៉ោង យូគី នៅផ្សារតន់ហន់ ភូមិព្រែកក្រឹស ឃុំព្រែកក្រើស ស្រុកកំពង់ត្រាច ខេត្តកំពត បានដំណើរការលេងជាយូរមកហើយ មួយអាទិត្យលេងប្រាំពីរថ្ងៃ ដោយពុំឃើញអាជ្ញាធរមូលដ្ឋានបង្រ្កាបនោះឡើយ អាចថាជាឆ្នាំងបាយរបស់សមត្ថកិច្ចទើបធ្វើជាខ្វាក់ភ្នែកមើលមិនឃើញ ទោះបីប្រជាពលរដ្ឋរិះគន់ថា គោលនយោបាយភូមិឃុំមានសុវត្តិភាពត្រូវបរាជ័យទាំងស្រុង ដោយអាជ្ញាធរស្រុកកំពង់ត្រាចមិនបង្រ្កាបបនល្បែងខាងលើនេះក៏ដោយ។
មួយវិញទៀត គេឃើញមានជនអន្តោប្រវេសន៏វៀតណាមខុសច្បាប់ចូលមកលេងល្បែងនៅភូមិព្រែកក្រឹសយ៉ាងច្រើន បង្ហាញពីការឆកល្វែងរបស់សមត្ថកិច្ចក្នុងការទប់ស្កាត់ជនអន្តោប្រវេសន៏វៀតណាមចូលទឹកដីខ្មែរដោយខុសច្បាប់ថែមទៀតផង។
តាមប្រភពពីប្រជាពលរដ្ឋឲ្យដឹងទៀតថា មេសង្វៀនជល់មាន់ បៀ អាប៉ោង យូគី នៅផ្សារតន់ហន់មានឈ្មោះចូច ត្រូវជាកូនរបស់លោកមេឃុំព្រែកក្រើស ស្រុកកំពង់ត្រាច ដែលជាខ្នងបង្អែក ទើបសមត្ថកិច្ចយល់ញាតិឃ្លាតច្បាប់ បណ្តោយឲ្យឈ្មោះចូចបើកបនល្បែងម៉ាសេរី លើគំនរទុក្ខ និងភាពសុខសាន្តរបស់ប្រជាពលរដ្ឋ ព្រោះថាទីណាមានល្បែង ទីនោះមានចោរហារយ មានអំពើឃោឃៅក្នុងគ្រួសារ រលាយហិនហោចទ្រព្យសម្បត្តិ មិនទទួលជោគជ័យទេគោលនយោបាយភូមិឃុំមានសុវត្តិភាពដែលរាជរដ្ឋាភិបាលដាក់ចេញឲ្យមន្ត្រីមូលដ្ឋានអនុវត្តន៏នោះ។
ករណីបើកបនល្បែងស៊ីសងខាងលើ ឈ្មោះចូចបានបំភ្លឺតាមទូសព្ទ័ថាខ្លួនពុំមានជាប់ពាក់ពន្ធ័ទេ ខ្លួនរកស៊ីតែប្រមូលភាស៊ីផ្សារតែប៉ុណ្ណោះ ចំណែកមេឃុំព្រែកក្រឹស នៅពេលទូរសព្ទ័ចូលមានអ្នកទទួលតែឆ្លើយថាច្រឡំលេខទៅវិញ។
គេហទំព័រ សម្លេងសច្ចៈបានខលទៅលោកអ៊ុម ស៊ីណាត អភិបាលស្រុកកំពងត្រាច បានឲ្យដឹងថាលោកបានចាត់ការឲ្យគេចុះទៅធ្វើការងារហ្នឹង ហើយកំពុងតាមមើល តើវាបានអនុវត្តតាមបទបញ្ជាហ្នឹងទេ។
ទោះបីយ៉ាងណា ប្រជាពលរដ្ឋទទូចសុំឲ្យលោកអភិបាលខេត្តកំពត លោកស្នងការនគរបាលខេត្ត លោកអភិបាលស្រុកកំពង់ត្រាច លោកអធិការស្រុក ចាត់វិធានការណ៏បឹទបនល្បែងនៅផ្សារតន់ហន់ ភូមិព្រែកក្រឹសជាបន្ទាន់ ដើម្បីសុខសុវត្តិភាពរបស់ប្រជាពលរដ្ឋ និងទប់ស្កាត់ជនអន្តោប្រវេសន៏វៀតណាមហូរចូលដោយខុសច្បាប់ ស្របតាមអនុសាសន៏សម្តេចតេជោ ដែលឲ្យមន្ត្រីខិតខំបំរើរាស្រ្ត មិនមែនធ្វើជាមន្ត្រីជើងដប់ បនល្បែងបើកលេងគគ្រឹកគគ្រេងនៅមូលដ្ឋានរបស់ខ្លួនហើយមើលមិនឃើញនោះឡើយ៕
