ខេត្តសៀមរាប ៖លោកទា គឹមសុទ្ធ នាយខណ្ឌរដ្ឋបាលព្រៃឈើ ខេត្តសៀមរាប បានរងនូវការរិះគន់យ៉ាងខ្លាំងពីប្រជាពលរដ្ឋដែលបានចោទថា លោកបណ្តោយនិងបឹទភ្នែកឲ្យមន្ត្រីព្រៃឈើថ្នាក់ក្រោមឃុបឃិត ឬ បើកភ្លៀងខៀវឲ្យក្រុមឈ្មួញដឹកជញ្ជូនឈើខុសច្បាប់ទាំងយប់ ទាំងថ្ងៃនៅស្រុកស្វាយលើ ។
ប្រជាពលរដ្ឋរស់នៅភូមិកន្ទួតខ្នារក្រៅ ឃុំកន្ទួត ស្រុកស្វាយលើ បានឲ្យថាមន្ត្រីរបស់លោក ទា គឹមសុទ្ធ មួយចំនួនដូចជាឈ្មោះ សេង លន នាយសង្កាត់រដ្ឋបាលព្រៃឈើកន្ទួតខ្នារក្រៅ បាននិងកំពុងឃុបឃិតជាមួយក្រុមឈ្មួញមានដូចជាឈ្មោះធឹង ប៊ុនស្រេងដែលជាឈ្មួញរកស៊ីឈើខុសច្បាប់ដុះស្លែ ដឹកជញ្ជូនឈើនៅតំបន់នេះយ៉ាងអណាធិបតេយ្យ ហើយយកមកចែកចាយតាមដេប៉ូមួយចំនួន ក្នុងទឹកដីខេត្តសៀមរាប ។
ប្រជាពលរដ្ឋរិះគន់ថា លោក សេង លន ជាមន្ត្រីបង្ក្រាបព្រៃឈើនៅតំបន់នោះ ចុះហេតុម្តេចពេលឃើញសកម្មភាពដឹកជញ្ជូនឈើយ៉ាងអនាធិបតេយ្យដូច្នេះលោកបែជាមើលមិនឃើញនិងមិនបង្ក្រាប ដូច្នេះមានតែ ឃុបឃិតគ្នាឈ្មួញ ទើបសម្ងំស្ងៀមចាំទទួលផលដូច្នេះ ។
ការកាប់បំផ្លាញព្រៃឈើនៅតំបន់ខាងលើគឺជាការឃុបឃិតគ្នាប្រព័ន្ធ ហើយបែងចែកផលប្រយោជន៍ឲ្យគ្នាទៅវិញទៅមក រវាងមន្ត្រីជំនាញនិងក្រុមឈ្មួញ ប្រជាពលរដ្ឋក៏បានដឹងអំពីករណីនេះ ។ ប៉ុន្តែអ្វីដែលដែលចម្លែកគឺមន្ត្រីអ្នកបង្ក្រាបព្រៃឈើបែរជាឃុបឃិតជាមួយអ្នករកស៊ីឈើ ហើយបើកភ្នែកមើលក្បួនដឹកឈើ ហើយចាំទទួលភោគផល ។
ប្រជាពលរដ្ឋសុំឲ្យលោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តមេត្តាកុំរឹងត្រគៀកស្តូកពេក ហើយពិនិត្យមើលកូនចៅថ្នាក់ក្រោមផង ព្រោះបើបណ្តោយតែដូច្នេះនោះគឺព្រៃឈើនៅខេត្តសៀមរាប ខេត្តព្រះវិហារប្រាកដជារលាយហិនហោចមិនខាន ៕
