ភ្នំពេញ៖អ្នកនាំពាក្យគណបក្សសង្គ្រោះជាតិ លោកយឹម សុវណ្ណ បានធ្វើសន្និសីទកាសែត នៅទីស្នាក់ការកណ្តាលគណបក្សសង្គ្រោះជាតិ ស្ថិតនៅសង្កាត់ចាក់អង្រែលើ ខណ្ឌមានជ័យ អះអាងថា មូលហេតុដែលក្រុមតំណាងរាស្ត្រគណបក្សសង្គ្រោះជាតិបន្តធ្វើពហិការមិនចូលប្រជុំរដ្ឋសភាដូចការគ្រោងទុក ដោយសារគណបក្សសង្គ្រោះជាតិទទួលបានព័ត៌មានពីមជ្ឈដ្ឋាននានាថា មានការគំរាមកំហែងមកលើក្រុមតំណាងរាស្ត្រខ្លួន ប៉ុន្តែមិនបានបញ្ជាក់អំពីការគំរាមកំហែងនោះទេ។
លោក យឹម សុវណ្ណ បានថ្លែងថា បើចង់ឲ្យដំណើរការបោះឆ្នោត ប្រព្រឹត្តក្នុងបរិយាល្អលុះត្រា តែគណបក្សសង្គ្រោះជាតិ និងគណបក្សប្រជាជនកម្ពុជា សំអាតបរិយាកាស នយោបាយជាមុន ។ ការបោះឆ្នោតដោយសេរី ត្រឹមត្រូវ និងយុត្តិធម៌ទាល់តែភាគីទាំងពីររួមគ្នាសំអាតបរិយាកាសនយោបាយ។ហើយភាគីម្ខាងទៀតបង្ហាញឆន្ទៈមិនចូលរួមដោះស្រាយ យើងខ្ញុំក៏មិនអាចធ្វើបានដែរ ។
លោក យឹម សុវណ្ណ បានបញ្ជាក់ថា យើងទទួលបានព័ត៌មានចុងក្រោយ គឺថា មានការគំរាមកំហែងមកលើក្រុមអ្នកតំណាងរាស្ត្រ និងថ្នាក់ដឹកនាំគណបក្សសង្គ្រោះជាតិ ខណដែលយើងបានធ្វើការប្រមែប្រមូលព័ត៌មាន កាលពីព្រឹកមិញ បន្ទាប់មកយើងធ្វើការជួបជុំគ្នានិងសម្រេចចិត្តរួមគ្នាថា តំណាងរាស្ត្រ CNRP មិនត្រូវទៅចូលរួមប្រជុំសភាព្រឹកនេះទេ ៕
ហាក់ឆ្លើយតប ទៅនឹងការមិនចូលប្រជុំសភា របស់ក្រុមតំណាងរាស្ត្រគណបក្សសង្គ្រោះជាតិ សម្តេចតេជោ ហ៊ុន សែន បានបង្ហោះនៅលើ Facebook របស់សម្តេចថា ពេលនេះ រដ្ឋសភាដំណើរការអនុម័តច្បាប់ ជាធម្មតាហើយរដ្ឋសភាមិនមែន ជាចំណាប់ខ្មាំងរបស់ក្រុមណាទេ សម្តេចបានលើកឡើងថា «ទោះមាន់មិនរងាវ ក៏ព្រះអាទិត្យរះដែរ»។
គួរបញ្ជាក់ថា នៅព្រឹកថ្ងៃទី០៧ ខែតុលា ឆ្នាំ២០១៦នេះ រដ្ឋសភាបានបើកសម័យប្រជុំពេញអង្គលើកទី៧ សម្រាប់នីតិកាលទី៥នេះ ដោយមានរបៀបវារៈចំនួន៨ នឹងត្រូវពិភាក្សានិងអនុម័ត។ ប៉ុន្តែបក្សប្រឆាំង ដែលបានត្រៀមខ្លួនរួចជាស្រេច ដើម្បីចូលសភានោះ បានផ្លាស់ប្តូរជំហររបស់ខ្លួនឯងវិញ ដោយធ្វើពហិការមិនចូលប្រជុំសភា៕
