ភ្នំពេញ ៖ នៅខែវិច្ឆិកាខាងមុខនេះ ក្រសួងនឹងបិទលេខទូរស័ព្ទទាំងឡាយណា ដែលទិញលេខមិនបានប្រើប្រាស់ឯកសារបញ្ជាក់អត្តសញ្ញាណ ក្រោមហេតុផលដើម្បីការពារសន្តិសុខសុវត្ថិភាពជាតិ។
នៅក្នុងសេចក្តីណែនាំរបស់និយ័តករទូរគមនាគមន៍កម្ពុជាចេញផ្សាយនៅថ្ងៃទី២៩ ខែកញ្ញា បានបញ្ជាក់ថាក្រសួងមហាផ្ទៃក្រសួងប្រៃសណីយ៍និងទូរគមនាគមន៍និងនិយ័តករទូរគមនាគមន៍កម្ពុជាបានសម្រេចឲ្យស៊ីមកាតឬលេខទូរស័ព្ទទាំងអស់ត្រូវមានអត្តសញ្ញាណសម្គាល់ត្រឹមថ្ងៃទី១ ខែវិច្ឆិកា។
សេចក្តីណែនាំនោះបានប្រាប់ឲ្យអ្នកចែកចាយឬលក់លេខទូរស័ព្ទទាំងអស់ រំឭកឲ្យអ្នកប្រើប្រាស់ឲ្យផ្តល់ឯកសារសម្គាល់លេខនោះហើយថាបើការរំឮកនឹងបិទបណ្តោះអាសន្ន ហើយអ្នកប្រើប្រាស់មិនព្រមផ្តល់ឯកសារសម្គាល់ទៀតនឹងត្រូវបិទលេខនោះទាំងស្រុងតែម្តង។
គួរបញ្ជាក់ថា ឯកសារសម្គាល់ដែលក្រសួងតម្រូវនោះមាន ពលរដ្ឋទូទៅគឺអត្តសញ្ញាណប័ណ្ណសញ្ញាតិខ្មែរ ចំពោះអ្នកប្រើលេខស្ថាប័នមានការបញ្ជាក់ពីស្ថាប័ន ចំពោះព្រះសង្ឃប្រើសង្ឃដីកា និងចំពោះជនបរទេសប្រើលិខិតឆ្លងដែននិងទិដ្ឋការស្នាក់នៅ៕
