រាជធានីភ្នំពេញ ៖ តាមសេចក្តីរាយការណ៍ លោក កឹម សុខា ប្រធានស្តីទីគណបក្សសង្គ្រោះជាតិ បានទៅចុះឈ្មោះបោះឆ្នោតរួចហើយ នៅសង្កាត់ចាក់អង្រែលើ រាជធានីភ្នំពេញ ខណៈដែលលោកមានទីលំនៅក្នុងសង្កាត់បឹងកក់២ ខណ្ឌទួលគោក និងមួយទៀតនៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។
គេឃើញអ្នកគាំទ្រលោក កឹម សុខា រាប់រយនាក់បានជូនដំណើរ ប្រធានស្តីទីគណបក្សប្រឆាំងរូបនេះ ទៅចុះឈ្មោះបោះឆ្នោត នៅព្រឹកថ្ងៃពុធនេះផងដែរ ៕
ក្រោយចុះឈ្មោះបោះឆ្នោតរួច លោក កឹម សុខា ប្រធានស្តីទីគណបក្សសង្គ្រោះជាតិ បានបង្ហាញនូវក្តីសង្ឃឹមថា ស្ថានការណ៍ នយោបាយនៅក្នុងប្រទេសកម្ពុជា ជាពិសេសនយោបាយរបស់គណបក្សទាំងពីរ នឹងវិលទៅរកប្រក្រតីភាពឡើងវិញ ដើម្បីឱ្យការបោះឆ្នោតមានលក្ខណៈសេរី ត្រឹមត្រូវ និងយុត្តិធម៌។
លោក កឹម សុខា បានអះអាងម្តងទៀតថា លោកបានស្នាក់នៅទីស្នាក់ការគណបក្សសង្គ្រោះជាតិ រយៈពេលជាង៤ខែមកនេះ គឺដើម្បីទាមទារឱ្យមានដំណោះស្រាយនយោបាយ ដែលមានលក្ខណៈល្អប្រសើរ សម្រាប់ប្រជាពលរដ្ឋ និងការបោះឆ្នោត ប៉ុណ្ណោះ ។
គួរបញ្ជាក់ថា ការថ្លែងរបស់លោក កឹម សុខា ធ្វើឡើង បន្ទាប់ពីលោកចាកចេញពីទីស្នាក់ការគណបក្ស ទៅចុះឈ្មោះបោះឆ្នោត កាលពីព្រឹកមិញ ហើយពុំមានការរុកគួនពីសមត្ថកិច្ច ដូចអ្វីដែលគណបក្សប្រឆាំងបានគិតនោះឡើយ ។
ចំណែកអ្នកនាំពាក្យគណបក្សប្រជាជនកម្ពុជាបានឲ្យដឹងថា លោកកឹម សុខា មានសិទ្ធដូចប្រជាពលរដ្ឋដ៏ទៃទៀត ល្គឹកណាសាលក្រមសាលាដំបូងមិនទាន់ចូលជាស្ថាពរ៕
