ភ្នំពេញ: ក្រោយពីមានប្រតិកម្មពីគណបក្សប្រជាជនកម្ពុជានិងរាជរដ្ឋាភិបាល រហូតមកដល់ពេលនេះ គណបក្សសង្គ្រោះជាតិ នៅមិនទាន់កំណត់ថ្ងៃ ពិតប្រាកដ ក្នុងការធ្វើមហាបាតុកម្មនោះទេ ប៉ុន្តែគណបក្សសង្គ្រោះជាតិ បានឲ្យតំណាងរាស្ត្រ របស់ខ្លួន ត្រៀមកម្លាំងប្រជាពលរដ្ឋ មកពីតាមបណ្តាខេត្ត ចូលមកធ្វើបាតុកម្ម នៅរាជធានីភ្នំពេញ។
លោក យឹម សុវណ្ណ អ្នកនាំគណបក្សសង្គ្រោះជាតិ បានថ្លែងនៅក្នុងកម្មវិធី សំណេះសំណាល ជាមួយយុវជនគណបក្សសង្គ្រោះជាតិ រាជធានីភ្នំពេញ នៅព្រឹកថ្ងៃទី១៧ ខែកញ្ញា នេះថា សូមអង្វរគណបក្សប្រជាជនកម្ពុជា ជួយដោះស្រាយបញ្ហាទៅ កុំអោយមានបាតុកម្ម ទូទាំងប្រទេស។
ការសូមអង្វររបស់ អ្នកនាំពាក្យគណបក្សសង្គ្រោះជាតិ បានធ្វើឡើង ខណៈដែលគណបក្សប្រជាជនកម្ពុជា មិនរវីរវល់ និងមិនចាប់អារម្មណ៍ ចំពោះការព្រមាន ធ្វើមហាបាតុកម្ម របស់គណបក្សសង្គ្រោះជាតិ និងមិនចរចា ជាមួយគណបក្សសង្គ្រោះជាតិ។
លោកសុខ ឥសាន អ្នកនាំពាក្យ គណបក្សប្រជាជនកម្ពុជា បានបញ្ជាក់ថា បើគណបក្សសង្គ្រោះជាតិ ធ្វើមហាបាតុកម្ម ច្បាស់ជាត្រូវព្រនង់ហើយ។
ចំណែកលោក នាយឧត្តមសេនីយ៍ ខៀវ សុភ័គ អ្នកនាំពាក្យ ក្រសួងមហាផ្ទៃ បានមានប្រសាសន៍បញ្ជាក់ថា អាជ្ញាធរមានសមត្ថកិច្ច នឹងចាត់វិធានការផ្លូវច្បាប់ បើសិនជាបាតុកម្ម របស់គណបក្សសង្គ្រោះជាតិ ធ្វើខុសច្បាប់។
ដោយឡែក ក្នុងពិធីបើកការដ្ឋានស្ថាបនាផ្លូវបេតុង និងប្រឡាយអមសងខាងបឹងត្របែក កាលពីព្រឹកថ្ងៃទី១៧ខែកញ្ញានេះ លោកប៉ា សុជាតិវង្ស អភិបាលរាជធានីភ្នំពេញបានឲ្យដឹងថា
ការគំរាមថា នឹងធ្វើមហាបាតុកម្មរបស់គណបក្សប្រឆាំងនេះ ជាផលប្រយោជន៍ សម្រាប់ប្រទេសជាតិឬ? វាជាមធ្យោបាយដ៏ល្អ សម្រាប់ដំណោះស្រាយ របស់សង្គ្រោះជាតិឬ? ហើយរឿងនេះ មិនមែនគេមិនធ្លាប់នោះទេ ក្រោយបោះឆ្នោតឆ្នាំ២០១៣ គេបានធ្វើម្តងរួចទៅហើយ ប៉ុន្តែចុងក្រោយ លទ្ធផលបានមកដើម្បីអ្វី? គឺបានមកប្រជាពលរដ្ឋណា ដែលទៅធ្វើបាតុកម្ម តើទទួលបានលទ្ធផលអ្វីខ្លះ គឺអត់មាននោះទេ ។
លោកបន្តថា គេអាចអុជភ្លើងបាន បង្កាត់ភ្លើងឲ្យឆេះបាន ប៉ុន្តែគេគ្មានសមត្ថភាព នឹងពន្លត់ភ្លើងអគ្គិភ័យនោះទេ។ រឿងនេះ មិនមែនគ្រាន់តែរឿង បច្ចុប្បន្នភាពនេះទេ ។ ប្រវត្តិសាស្ត្រកម្ពុជា ក៏ធ្លាប់បានជួបប្រទះ ហើយក៏មិនលំបាក ក្នុងញុះញង់មនុស្ស ឲ្យចូលរួមធ្វើបាតុកម្ម ឲ្យធ្វើប្រឆាំងបែបនេះ ធ្វើប្រឆាំងបែបនោះ ប៉ុន្តែពេលបាតុកម្មឆេះហើយ អគ្គិភ័យឆេះហើយ នរណាជាអ្នកពន្លត់ ហើយមិនច្បាស់ថា អ្នកដែលមកបង្កាត់ភ្លើង ឲ្យឆេះហើយពន្លត់បាននោះទេ។
សង្គ្រាមឆ្នាំ៧០ បានបញ្ជាក់យ៉ាងច្បាស់លាស់ហើយ និងបាតុកម្មជាបន្តបន្ទាប់ ក្នុងការបញ្ឆេះការតវ៉ាផ្សេងៗ ធ្វើឲ្យកម្ពុជាបែកបាក់ និងរងទុក្ខសោកនាដកម្ម គ្រប់គ្រាន់ហើយ ។ ប្រវត្តិសាស្ត្រ បញ្ជាក់យ៉ាងច្បាស់ថា មិនគប្បីឲ្យយើងវិលត្រឡប់ ទៅរកការឈឺចាប់ ជាថ្មីបានទៀតទេ ។
លោកបន្ថែមថា” សន្តិភាព ស្ថិរភាព ដែលទទួលបាននៅថ្ងៃនេះ គឺកើតចេញពីការលះបង់ សាច់ស្រស់ឈាមស្រស់ របស់យុទ្ធជន មន្ត្រីរាជការ និងប្រជាជនកម្ពុជា យ៉ាងច្រើនមកហើយ ។ មិនស្រមើស្រមៃថា បាតុកម្មជាមធ្យោបាយដ៏ល្អ សម្រាប់ដោះស្រាយនោះទេ មហាបាតុកម្មនេះ គេគ្រោងឡើង ដើម្បីការពារបុគ្គលកឹមសុខា ៕
