ខេត្តឧត្តរមានជ័យ៖ ឈ្មួញឈើគ្រញូងយួន ពិតជាជើងខ្លាំងមែន ទើបតែបង្កហេតុជាមួយ អ្នកសារព័ត៌មាន បានជាង១ខែ នៅតែរកស៊ីដឹកឈើគ្រញូងយ៉ាងគគ្រឹកគគ្រេង អាងខ្នងក្រាស់ លុះសមត្ថកិច្ចក្តៅក្រហាយទើប តាមចាប់បំបាក់មុខឈ្មួញឈើគ្រញូង យួនជើងខ្លាំង។
ក្បួនរថយន្តដឹកឈើគ្រញូង ដែលគេបានស្គាល់ថា ជារថយន្ត របស់ ក្រុម ឈ្មួញឈើគ្រញូង ឈ្មោះ ខ្វៀង ធីម៉ៃ ហៅ យាយ ម៉ាយ ជាជនជាតិយួន មានខ្នង នៅពីក្រោយជាអ្នកមានអំណាច ត្រូវសមត្ថកិច្ចបង្ក្រាប និងមានការផ្ទុះអាវុធចំនួនជាង ១០គ្រាប់ ធ្វើឱ្យរថយន្ត ធ្លាក់ចូលទឹក ប្រឡាយ បណ្តាល ឱ្យ ក្រឡាប់រថយន្ត រងរបួសធ្ងន់ ទាំង០២ នាក់ បានកើតឡើង នៅវេលា ម៉ោង ០៩ យប់ ថ្ងៃទី ០៧ ខែ កញ្ញា ឆ្នាំ២០១៦ ស្ថិតនៅលើកំណាត់ផ្លូវជាតិលេខ ១៧១ ត្រង់ ចំណុចព្រៃលោក ស្ពាន អូរអំពិល ក្នុងភូមិថ្មី
ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ។
អ្នកបើកបរ រថយន្តដឹកឈើដឹកឈើគ្រញូង ម៉ាកលុចស៊ីពណ៌ខ្មៅ ពុំមានស្លាកលេខ ដែល ព្យាយាមបើករថយន្ត គៀរ រថយន្តសមត្ថកិច្ចទម្លាក់ផ្លូវ ហើយសមត្ថកិច្ចបាញ់បំបែកកង់ ឱ្យធ្លាក់ប្រឡាយ នោះ មានឈ្មោះ យឿន យៀត ភេទប្រុសអាយុ ២៥ឆ្នាំ ជាជនជាតិយួន បានរងរបួសស្មាខាងឆ្វេង និងឈ្មោះ ជុំ តុលា ភេទប្រុសអាយុ ១៩ឆ្នាំ ជាជនជាតិយួន បានរងរបួសភ្លៅខាងឆ្វេង បច្ចុប្បន្ន អ្នកទាំងពីរ រស់នៅ ភូមិអូរជញ្ជៀន ឃុំ-ស្រុកអន្លង់វែង ខេត្តឧត្តរមានជ័យ ហើយត្រូវបានបក្សពួកខ្លួនដឹកទៅមន្ទីរពេទ្យបង្អែក ខេត្តសៀមរាប ។
មហាជននិយាយថា៖ ស្រ្តី ជា ជនជាតិយួនឈ្មោះ ខ្វៀង ធីម៉ៃ ហៅ យាយ ម៉ាយ បានមកស្នាក់នៅស្រុកអន្លង់វែង ដឹកឈើគ្រញួង មានបក្សពួក ៤ ឫ ៥នាក់ទៀត តែងតែ ធ្វើសកម្មភាពដឹកជញ្ជូនឈើស្ទើរ រាល់យប់ ដោយមិនខ្លាច ញញើតសមត្ថកិច្ច មិនតែប៉ុណ្ណោះ បានបង្ករ ព្យុះភ្លៀង ជាញឹកញយ ជាក់ស្តែងកាលពី ថ្ងៃទី៣០ ខែកក្កដា ឆ្នាំ ២០១៦ កន្លងមក ថ្មីៗនេះ ឈ្មោះ ខ្វៀង ធីម៉ៃ ហៅយាយ ម៉ាយ រូបនេះ បានបើករថយន្ត ដេញ បុក រថយន្ត អ្នកសារព័ត៌មាន០២នាក់ ! ទី១.ឈ្មោះ លោក ខៀវ សុផានុរស្ស អ្នកយកព័ត៌មានបណ្តាញអប្សរា (ANN) និងទី២.លោក ប៉ែន នួន ដែលជាអ្នកយកព័ត៌មាន ឱ្យអង្គភាពចំនួន ៣ គឺ កាសែត នគរវត្ត ទូរទស្សន៍អប្សារា និង ទូរទស្សន៍ប៉ុស្តិ៍លេខ៨ បណ្តាលឱ្យ ខូច រថយន្ត ចំណែកស្រ្តីយួនរូបនេះ នៅតែរួចពី សំណាញ់ច្បាប់ដដែល មិនមានមន្រ្តី ស្ថាប័នណា ចាត់ការបានឡើយ ដោយមានមន្រ្តីមានអំណាចម្នាក់ឈ្មោះ ឡាយ គឹមឡេង ហៅ ( ស្រុន ) មេបញ្ជាការរង កងរាជអាវុធហត្ថ ខេត្ត ដែលជាមេចាំកាងឈ្មួញឈើ និងក្តោបប្រមូលទិញឈើ
គ្រញូងធំ ឧត្តរមានជ័យ ទើបខ្លាំងបែបនេះ ។
លោក អធិការស្រុកអន្លង់វែង បានប្រាប់បញ្តាញព័តមាននៅវេលាម៉ោង ០៩ និង០៧ នាទី ព្រឹកថ្ងៃទី ០៨ ខែកញ្ញា ឆ្នាំ២០១៦ ថា៖ បន្ទាប់ពីកូនចៅ រាយការណ៍មកថា មាន រថយន្តម៉ាកកាមរីបាឡែនមួយគ្រឿង ដឹកគ្រញូងចេញ ពីស្រុកអន្លង់វែង ឆ្ពោះទៅក្រុងសំរោង លោកក៏បានដាក់កម្លាំង ដើម្បីធ្វើការតាមបង្ក្រាប រថយន្តដឹកឈើ ក៏មានរថយន្តមួយគ្រឿងម៉ាកលុចស៊ីសពណ៌ខ្មៅខាងលើ បានបើកមកបិទ ពីមុខរថយន្ត សមត្ថកិច្ច ខណៈនោះ ស្រាប់តែ ស្រ្តីម្នាក់ឈ្មោះខ្វៀង ធីម៉ៃ ហៅ យាយ ម៉ាយ បានបើករថយន្ត មកពាំងបន្ថែមទៀត ដើម្បីឱ្យរថយន្តដឹកឈើគ្រញូងបើកចេញទៅ ។ ភ្លាមៗនោះ លោកអធិការ ក៏បានបញ្ជាឱ្យតាមចាប់ រថយន្ត ដឹកឈើនោះ តែមានរថយន្តម៉ាកលុចស៊ីស បានគៀររថយន្តសមត្ថកិច្ច បណ្តាលឱ្យធ្លាក់ផ្លូវជាច្រើនលើកច្រើនសា ទើបលោកសម្រេចចិត្ត បាញ់បំបែកកង់រថយន្ត ដែលគៀរសមត្ថកិច្ច ហើយរថយន្តនោះក៏ធ្លាក់ចូលទៅប្រឡាយតែម្តង ។
ប្រជាពលរដ្ឋ សំណូមពរដល់ មន្រ្តី ជាន់ខ្ពស់ មានចំណាត់ការ ដល់ជនបង្ក ដែលជាជនជាតិយួនដែនបានរារាំងសមត្ថកិច្ច និង បង្កបញ្ហាដល់ស្ថាប័ន ពាក់ព័ន្ធផ្សេងៗទៀត ដោយចាត់ទុក មន្រ្តីស្ថាប័ន រដ្ឋ ដូចសម្រាម និងមានចំណាត់ការដល់មន្រ្តីដែលយក អំណាច ទៅចូលខ្លួនជាមួយ បទល្មើស និង ចាំកាង មិនគិតគូរ ពីមុខមាត់ និងកិត្តិយស ប្រទេសជាតិ នោះ ៕
