រាជធានីភ្នំពេញ ៖ ប្រធានស្តីទីគណបក្សសង្គ្រោះជាតិ បានបង្ហាញនូវយុទ្ធសាស្ត្រថ្មីរបស់ខ្លួនថា គណបក្សនឹងផ្តល់អាទិភាពដល់ស្ត្រី និងយុវជនណាដែលមាន សមត្ថភាពឈរឈ្មោះជាបេក្ខជន ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខ ។
លោក កឹម សុខា បានថ្លែងបញ្ជាក់កាលពីព្រឹកថ្ងៃពុធនេះថា លោកមានមោទនភាពខ្លាំងណាស់ ចំពោះស្រ្ដីឆ្នើម ទាំងអស់របស់ គណបក្សសង្គ្រោះជាតិ ដែលមានឆន្ទៈមោះមុតក្នុងគោលបំណងឈរឈ្មោះជាបេក្ខជនបោះឆ្នោត ជ្រើសរើស ក្រុមប្រឹក្សាឃុំ-សង្កាត់ ឆ្នាំ២០១៧ខាងមុខនេះ ។
ដូច្នេះគណបក្សសង្គ្រោះជាតិមានគោលការណ៍ដែលជាលក្ខណៈសម្បត្ដិ ក្នុងការជ្រើសរើសបេក្ខជន ដែលមានជាអាទិ៍៖ ឆន្ទៈ សមត្ថភាព លទ្ធភាព សកម្មភាព និងសីលធម៌។ ក៏ប៉ុន្ដែ ទោះបីជាផ្អែកលើលក្ខណៈ សម្បត្ដិទាំង៥ ខាងលើនេះក៏ដោយ ក៏ក្នុងនាមថ្នាក់ដឹកនាំគណបក្សសង្គ្រោះជាតិ និងក្នុងនាមលោកផ្ទាល់ ប្រាកដណាស់នឹងផ្ដល់ជាអាទិភាពទៅលើស្រ្ដីនិងយុវជន ដែលជាអនាគតរបស់ប្រទេសជាតិ ។
គួរបញ្ជាក់ថា លោកកឹម សុខា ត្រូវបានឃ្លុំបេនៅទីស្នាក់ការបក្ស មិមហ៊ានចេញក្រៅ ដោយជាប់បណ្តឹង អ្នកនាងខុម ចាន់តារាទី៕
