រាជធានីភ្នំពេញ ៖ ក្រោយពីភាពអសកម្មការងារ របស់កញ្ញាអនុសេនីយ៍ត្រី ខេង សុខកញ្ញា ដែលជាមន្ត្រីធ្វើប៉ាស្ព័រ អត្តលេខ៧៧១១៥ ត្រូវបានបង្ហោះ និងចែកចាយតគ្នាតាមបណ្ដាញសង្គមហ្វេសប៊ុកមក នាយកដ្ឋានលិខិតឆ្លងដែន បានចេញលិខិតបង្គាប់ការ សម្រេចផ្ទេរភារកិច្ច កញ្ញា ឋានៈមន្ត្រីនៃការិយាល័យ បែបបទឲ្យទៅបំរើការងារ នៅការិយាល័យ រដ្ឋបាល-សរុប នៃនាយកដ្ឋានលិខិតឆ្លងដែនវិញ។
ក្នុងលិខិតបង្គាប់ការនោះដែរ ប្រធាននាយកដ្ឋានលិខិតឆ្លងដែន លោក ព្រហ្ម ចាន់សុខា បាន ថ្លែងអំណរគុណចំពោះ សាធារណជនដែលបាន បង្ហោះភាពអសកម្មក្នុង នាយកដ្ឋានលិខិតឆ្លងដែន នៅក្នុងបណ្ដាញសង្គម ហ្វេសប៊ុក ហើយក្នុងនាមលោកជាអ្នកទទួលខុសត្រូវរបស់អង្គភាព សូមទទួលយក និងបំភ្លឺជូនសាធារណជនឲ្យបានជ្រាប។
ក្នុងលិខិតបានបញ្ជាក់ថា ចំពោះករណីមន្ត្រីប្រើប្រាស់ ទូរស័ព្ទ នៅពេលកំពុងបំរើការជូប្រជា ពលរដ្ឋ និងភាពអសកម្មនានា នាយកដ្ឋានបានធ្វើការ អប់រំណែនាំជាប្រចាំ និងបានដាក់ពិន័យ ទៅតាមនីតិវិធី និងបទបញ្ជារបស់កងកម្លាំង នគរបាលជាតិ ជាពិសេសថ្មីនេះ បានផ្លាស់មន្ត្រី ដែលប្រព្រឹត្តខុសនឹងវិន័យ ឲ្យទៅទទួលការអប់រំ នៅការិយាល័យរដ្ឋបាល-សរុប។
កាលពេលថ្មីកន្លងទៅសកម្មភាពមន្ត្រីខាងលើនេះត្រូវបណ្តាអ្នកលេងបណ្តាញសង្គមចែករំលែកតៗគ្នា និងរងនូវការរិះគន់យ៉ាងចាស់ដៃផងដែរពីមជ្ឈដ្ឋានទូទៅ៕
