ខេត្តសៀមរាប៖ នៅព្រឹកថ្ងៃទី០៧ ខែ សីហា ឆ្នាំ២០១៦ ឯកឧត្តម ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជារដ្ឋមន្ត្រីក្រសួងទេសចរណ៍ ឯកឧត្តម ឃឹម ប៊ុនសុង អភិបាលខេត្តសៀមរាប បានអញ្ជើញជាអធិបតី ក្នុងទិវារត់ប្រណាំងអន្តរជាតិ ម៉ារ៉ាតុងចក្រភព អង្គរ លើកទី៣ នៅខាងមុខប្រាសាទអង្គរវត្ត ទឹកដីប្រវតិ្តសាស្ត្រ ខេត្តសៀមរាប និងមានការអញ្ជើញចូលរួម ពីសំណាក់ជាភ្ញៀវជាតិ អន្តរជាតិ ដែលជា កីឡាករ កីឡាការិនីជាតិ អន្តរជាតិចូលរួម ចំនួនសរុប ២ពាន់ ៣៧០នាក់ ក្នុងនោះមាន កីឡាករ កីឡាការិនីជនបរទេសចំនួន ១ពាន់ ៤០០នាក់ មកពី ៤៥ ប្រទេសចូលរួម ។
ដែលគួរចំឡែក និងមហាកិត្តិយសដែរនោះ ក៏មាន ព្រះរាជវត្តមានដ៏ថ្លៃថ្លារបស់ អ្នកអង្គម្ចាស់ BAJRAKITIYABHA MAHIDOL ព្រះទាយាទ ព្រះមហាក្សត្រ ថៃ បានយាងអញ្ជើញចូលរួម ក្នុងព្រឹត្តិ – ការណ៍ម៉ារ៉ាតុងអន្តរជាតិចក្រភពអង្គរនេះផងដែរ ។
នេះជាលើកទី៣ហើយ ការប្រារព្ធទិវារត់ប្រណាំងអន្តរជាតិ ម៉ារ៉ាតុងចក្រភពអង្គរ ដែលរៀប ចំឡើងនៅមុខប្រាសាទអង្គរ ដែលជាសម្បត្តិបេតិកភណ្ឌពិភពលោក ដែល កេរ្តិ៍មរកត ដូនតា ខ្មែរយើងបានបន្សល់ទុកនាសម័យចក្រភពអង្គរ នៃសតវត្សរ៍ទី១២ ហើយបានកំពុងមាន ភាពល្បី ល្បាញ ក្នុងការទាក់ទាញភ្ញៀវទេសចរណ៍ មកពីគ្រប់មជ្ឈដ្ឋាន លើពិភពលោកចូល មក ទស្សនាកម្សាន្ត ។
ព្រឹត្តិការណ៍រត់ប្រណាំងអន្តរជាតិ ម៉ារ៉ាតុងចក្រភពអង្គរ ត្រូវបាន រាជរដ្ឋាភិបាលកម្ពុជា កំណត់យក ក្នុងខែ សីហា ជារៀងរាល់ឆ្នាំ ដែលត្រូវប្រារព្ធធ្វើឡើង ។
ថ្មីៗនេះ កម្ពុជាត្រូវបានទទួលស្គាល់ជា (គោលដៅទេសចរណ៍ល្អបំផុតលើពិភពលោក ឆ្នាំ ២០១៦ និង ត្រូវបានប្រកាសជា គោលដៅវប្បធម៌ពេញនិយមឆ្នាំ២០១៦ ) ដោយក្រុមទេសចរណ៍ និងពាណិជ្ជករ អឺរ៉ុប ព្រមទាំងការបោះឆ្នោតជ្រើសតាំងសម្តេចតេជោ ហ៊ុន សែន ជាសមាជិកកិត្តិយស នៃបណ្ឌិតសភាទេសចរណ៍ អឺរ៉ុប ទៀតផង ។
ម៉្យាងទៀត ក៏បានចាត់ទុកព្រះរាជាណាចក្រកម្ពុជា ជាគោលដៅទេសចរណ៍ ដ៏ទាក់ទាញបំផុតកម្រិត ពិភពលោក ដោយមានប្រាសាទអង្គរវត្តជាប់ចំណាត់ថ្នាក់លេខ១ ទាំងក្នុងអាស៊ី និង ពិភពលោក ដែលជាទីតាំងទេសចរ សម្គាល់អត្តសញ្ញាណជាតិ ដ៏ទាក់ទាញជាងគេបំផុត ហើយទីក្រុងសៀមរាបជាប់ចំណាត់ថ្នាក់លេខ១តំបន់អាស៊ី និង លេខ២ ក្នុងពិភពលោក ដែលជាគោលដៅទេសចរណ៍ដែលទាក់ទាញជាងគេ ។
ចក្ខុវិស័យកម្ពុជា បានកំពុងអភិវឌ្ឍន៍វិស័យទេសចរណ៍ ជាគោលដៅទេសចរណ៍វប្បធម៌ និង ធម្មជាតិ ព្រមទាំងផ្តល់ភាពកក់ក្តៅ បដិសណ្ឋារកិច្ចល្អ ដោយឈរលើទស្សនៈ និង គោលការណ៍ ស្អាត និង បៃតង រត់ប្រណាំងម៉ារ៉ាតុងនាពេលនេះគឺ ដើម្បីទីក្រុងបៃតង មនុស្សធម៌ សុខភាព មិត្តភាព សាមគ្គីភាព និងដើម្បីការពារបរិស្ថាន ភពផែនដីផងដែរ ៕
