ខេត្តក្រចេះ ៖ កម្លាំងកងរាជអាវុធហត្ថ សហការជាមួយ សង្កាត់រដ្ឋបាលព្រៃឈើថ្មគ្រែដឹកនាំដោយលោក ទ្រី ម៉េងលាង នាយរងផ្នែក រដ្ឋបាលព្រៃឈើក្រចេះ ចាប់ឃាត់រថយន្ដសាំយ៉ុង ដឹកជន្លង់ម្រេច ជាង១០គ្រឿង ដែលតែងតែបើកបិទគូទគ្នា យ៉ាងអនាធិបតេយ្យ បង្ករឲ្យមានការភ័យខ្លាច ដល់អ្នកដំណើរតាមដងផ្លូវ កាលពីវេលាម៉ោង ១០និង២០ យប់ ថ្ងៃទី២ ខែសីហា ឆ្នាំ២០១៦ នៅមុខទីបញ្ជាការដ្ឋាន អាវុធហត្ថក្រុងក្រចេះ ដើម្បីធ្វើកំណត់ហេតុ។
រថយន្ដសាំយ៉ុងជាង ១០គ្រឿង ដឹកជន្លង់ម្រេចនោះ គឺដឹកចេញពី ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ឆ្លងដរប្រលូង ដឹកកាត់ខេត្តក្រចេះ បន្ដទៅលក់នៅ ខេត្តត្បូងឃ្មុំ និងខ្លះទៀត យកទៅលក់នៅ ព្រំប្រទល់វៀតណាម ជាងរៀងរាល់ថ្ងៃ ដោយបើកបរក្នុងល្បឿនលឿនមិនគោរពច្បាប់ចរាចរណ័ បង្កគ្រោះថ្នាក់ដល់អ្នកធ្វើដំណើរ និងបានបុកគ្នាឯង បណ្ដាលឲ្យមានមនុស្សរងរបួសធ្ងន់ និងស្លាប់ជាបន្តបន្ទាប់។
ក្រោយពេល សមត្ថកិច្ចឃាត់ចាប់ រថយន្ដទាំងនោះ ស្រាប់តែក្រុម អ្នកដឹកជន្លង់ម្រេចទាំងនោះ ចុះស្រែឡូឡារើជន្លង់ម្រេច ទម្លាក់ចោលគំរាមវាយ រថយន្តសមត្ថកិច្ច ដោយអ្នកខ្លះ បើកឡានបំរុងបុក ឡានសមត្ថកិច្ច និងបើកឡានរត់គេច ប្រផាប់ប្រផីង បង្កការភ្ញាក់ផ្អើល ពេញដងផ្លូវ។ យ៉ាងណាក៏ដោយ សមត្ថកិច្ច នៅតែមានជំហរបង្ក្រាប បានរថយន្ដចំនួន ២គ្រឿង យកមករក្សាទុកបណ្ដោះអាសន្ន នៅអាវុធហត្ថ ក្រុងក្រចេះ។
នៅវេលាម៉ោង ៨ព្រឹក ថ្ងៃទី៣ ខែសីហា ឈ្មួញដឹកជន្លង់ម្រេច ប្រមាណជា ៥០នាក់ លើកគ្នាមកតវ៉ា នៅមុខសាលាខេត្តក្រចេះ ដើម្បីសុំអោយអាជ្ញាធរខេត្ត ជួយសម្រួលប្រគល់រថយន្ត អោយពួកគាត់វិញ និងជួយចេញថ្លៃព្យាបាល អ្នកដែលរងបួស ដោយសាររថយន្ដ បុកគ្នាឯង។
នេះជាទម្លាប់ហើយសំរាប់ខេត្តក្រចេះ អោយតែមានការបង្ក្រាប ឈ្មួញដឹកជន្លង់ម្រេចទាំងនោះ តែងតែមកបាតុកម្ម តវ៉ារហូត។ទោះបីយ៉ាងណា រថយន្ដនិងជន្លង់ម្រេច ដែលចាប់បាន ត្រូវនាំយក ទៅស្ថានីយ៍បណ្ដុះកូនឈើខ្សា ដើម្បីវាស់វែង និងផាកពិន័យ តាមផ្លូវច្បាប់ នេះបើតាមការឲ្យដឹង ពីមន្ត្រីរដ្ឋបាលព្រៃឈើថ្មគ្រែ ៕
