ខេត្តព្រះសីហនុ ៖ក្រសួងមហាផ្ទៃ បានចេញលិខិតស្នើដល់អភិបាលខេត្ត ព្រះសីហនុពិនិត្យឡើងវិញ ទាក់ទងការបញ្ចប់ភារកិច្ច និងតែងតាំង លោក ភេទ សុវណ្ណ ជាប្រធានការិយាល័យរបៀប និងឯកសារ នៅសាលាខេត្តព្រះសីហនុ ខណៈដែលការតែងតាំងនេះហាក់មិនទាន់ត្រឹមត្រូវតាមគោលការណ៍ និងលក្ខណៈសម្បត្តិនៅឡើយហើយអាចចាត់ទុកថា ជាលើកទី១ហើយ ដែលក្រសួងមហាផ្ទៃឈឺក្បាលហើយអោយពិនិត្យឡើងវិញ។
នៅក្នុងលិខិតរបស់ក្រសួងមហាផ្ទៃដដែល បានបញ្ជាក់បន្ថែមថា ក្រសួងបានទទួលដីការបស់សាលាខេត្តព្រះសីហនុ ស្តីពីការតែងតាំង ការផ្លាស់ប្តូរ និងការបញ្ចប់ភារកិច្ច មន្រ្តីរាជការចំនួន២២រូប បំពេញក្នុងរចនាសម្ព័ន្ធសាលាខេត្តព្រះសីហនុ ប៉ុន្តែដោយពិនិត្យ ឃើញថា ការតែងតាំង លោក ភេទ សុវណ្ណ គ្រងតំណែងជាប្រធានការិយាល័យរបៀប និងឯកសារ ប្រចាំខេត្តព្រះសីហនុ នៃទីចាត់ការរដ្ឋបាលសាលាខេត្ត ព្រះសីហនុ ដែលទើបតែងតែមានអតីតភាពការងារ រយៈពេល៣ឆ្នាំ ពុំស្របទៅតាមលក្ខខណ្ឌអតីតភាពការងារ ដែលបានកំណត់នៅក្នុងឧបសម្ព័ន្ធ នៃសេចក្តីណែនាំ របស់ក្រសួងសាធារណៈ ដែលបានកំណត់ថា ប្រធានការិយាល័យ សាលារាជធានីភ្នំពេញ ខេត្ត ត្រូវមានអតីតភាពការងារយ៉ាងតិច ៤ឆ្នាំ។
ក្រសួងមហាផ្ទៃ បានបញ្ជាក់ថា ដើម្បីអនុវត្តឲ្យបានត្រឹមត្រូវ តាមគោលការណ៍ និងនីតិវិធីដែលបានកំណត់ ក្រសួងមហាផ្ទៃស្នើឲ្យអភិបាលខេត្តព្រះសីហនុ ពិនិត្យឡើងវិញ លើការ ជ្រើសរើសមន្រ្តីរាជការណា ដែលមានលក្ខណៈសម្បត្តិ បទពិសោធន៍ និងលក្ខខណ្ឌ គោលការណ៍ បែបបទនិងនីតិវិធីដែលបានកំណត់ នៅក្នុងឧបសម្ព័ន្ធនៃសេចក្តីណែនាំរបស់ ក្រសួងសាធារណៈ ។
គួរបញ្ជាក់ថា មន្ត្រីរាជការក្នុងសាលាខេត្តព្រះសីហនុ បានបង្ហាញនូវការថ្នាំងថ្នាក់ជាបន្តបន្ទាប់ ចំពោះការតែងតាំងនិងតម្លើងឋានៈមន្ត្រីរាជការក្នុងខេត្តនេះ ដែលភាគច្រើនបង្ហាញនូវភាពមិនប្រក្រតីបក្សពួកគ្រួសារនិយមយ៉ាងច្រើន ក្រោយពេលដែលលោក យន្ត មីន មកគ្រងតំណែងជាអភិបាលខេត្ត ។ ការធ្វើបែបនេះមិនគ្រាន់តែជាទង្វើខុសឆ្គងទៅនឹងគោលការណ៍បែបបទ និងនិតិវិធីប៉ុណ្ណោះទេ តែវាជាការបង្ហាញឲ្យឃើញនូវអំពើពុករលួយនិងមានភាពមិនប្រក្រតីថែមទៀត ៕
