ឧត្តរមានជ័យ៖ ឈើប្រណីត ប្រភេទ នាងនួន ដែលកំពុងតែ មានតំលៃ នៅ ប្រទេសវៀតណាម ដែលចរាចណ៍ ឆ្លងដែនពីទឹកដីថៃ ចូលមកកម្ពុជា តាមភូមិសាស្រ្ត របស់ យោធាកាន់កាប់ ផ្នែកសឹករងស្រុកអន្លង់វែង ត្រូវបានកម្លាំងសមត្ថកិច្ចចម្រុះ ចុះធ្វើការបង្ក្រាប បាន១កង់ធំ រួចហើយ ត្រូវបានដោះលែងទៅវិញ ក្រោយពីមានការអន្តរាគមន៍ ពីមន្រ្តី មានអំណាច ។
ការបង្ក្រាបឈើប្រណីត នាងនួន ១ដុំធំ នេះមានមុខកាត់ ជាងមួយម៉ែត្រ និងមាន ប្រវែងជាង ២ ម៉ែត្រ ដែលមាន តំលៃរាប់ពាន់ ដុល្លារ ត្រូវបាន ដោះលែងទៅវិញ នៅព្រឹក ថ្ងៃទី ២៣ ខែកក្កដា ឆ្នាំ២០១៦ ម្សិលមិញនេះ ស្ថិតនៅត្រង់ចំណុចជាប់ ជើងភ្នំដងរែក ក្នុង ភូមិសាមគ្គី ឃុំត្រពាំងប្រីយ៍ ស្រុកអន្លង់វែង ក្នុងដែនកាន់កាប់ របស់ កងអនុសេនាធំការពារព្រំដែនលេខ៦ ដែលមានលោក ដែន មករា ហៅ ក្រួច និងលោក គង់ ខ្នា ជាមេ បញ្ជា ការផ្នែកសឹករង ស្រុកអន្លង់វែង ចំណុះឱ្យតំបន់ប្រតិបតិ្តការសឹករង ខេត្តឧត្តរមានជ័យ ។
សមត្ថកិច្ចចម្រុះបាននិយាយប្រាប់ថា៖ ឈើនាងនួនទាំងអស់ មានចំនួន ៥ ដុំធំៗ រីឯ ៤ដុំ ទៀត ត្រូវបានគេដឹកចេញយកទៅលាក់ទុកអស់ហើយ នៅសល់ចំនួន ១ដុំប៉ុណ្ណោះ ! ដោយសាតែបែកការ ទើបឈានដល់ សមត្ថកិច្ច ចម្រុះ ចុះទៅបង្ក្រាប ។
ចំពោះសមត្ថកិច្ច ដោះលែងវិញ និងដក កម្លាំងចេញមកវិញ មិនធ្វើការបង្ក្រាប ដោយសារ តែមានការអន្តរាគមន៍ពី មន្រ្តីកងរាជអាវុធហត្ថម្នាក់ឈ្មោះ ឡាយ គឹមឡេង ហៅ ស្រ៊ុន ជាមេបញ្ជាការ រង កងរាជអាវុធហត្ថខេត្តឧត្តរមានជ័យ ។
តាមការបញ្ជាក់ពីសមត្ថកិច្ចក្នុងស្រុកបានឱ្យដឹងថា៖ ឈើប្រណីតប្រភេទនាងនួន ចំនួន ៥ដុំខាងលើ ត្រូវបានគេប្រើ កម្លាំងពលរដ្ឋខ្មែរប្រមាណជាង ៤០នាក់ ឱ្យចូល ទៅអូស ចេញពីទឹកដី ថៃ អស់រយៈជាងមួយអាទិត្យ ទើបមកដល់ទឹកដីកម្ពុជា ។
ហើយមិនត្រឹមតែឈើនាងនួនប៉ុណ្ណោះទេ នៅក្នុងភូមិសាស្រ្តខាងលើ នៅមានឈើគ្រញូង ឈើបេង និងឈើធ្នង់ ដែលក្នុងមួយថ្ងៃៗ មានពលរដ្ឋខ្មែរ រាប់រយនាក់ បានឡើង ភ្នំ ឆ្លង ដែន ចូលអូស ឈើទាំងនោះ នៅក្នុងទឹកដីថៃ ក្រោមការបើកភ្លើងខៀវពីសំណាក់ លោក គង់ ខ្នា មេបញ្ជាការផ្នែកសឹករងស្រុកអន្លង់វែង ។
តាមការបញ្ជាក់ពីមន្រ្តីយោធាម្នាក់សុំមិនបញ្ចេញឈ្មោះបាននិយាយថា៖ គេមិនខ្វល់ ពីពលរដ្ឋខ្មែរ ឆ្លងដែន ចូលអូសឈើក្នុងទឹកដីថៃ ដែលត្រូវទាហានថៃ បាញ់ស្លាប់ ឫក៍ របួស និងចាប់ខ្លួននោះទេ សំខាន់ឱ្យតែមានលុយ ដើម្បីផ្គត់ផ្គង់មេ ទៅបានហើយ គឺ វាចប់រឿងទៅបាត់ហើយ ។
ពាក់ព័ន្ធនឹងសកម្មភាពខាងលើ មិនអាចធ្វើការបំភ្លឺ ទៅលោកឧត្តមសេនីយ៍ត្រី តុន ញាណ មេបញ្ជាការតំបន់ប្រតិបត្តិសឹករងខេត្តឧត្តរមានជ័យ បានទេ ដោយសាតែ រកលេខទូរស័ព្ទ មិនបាន ៕
