ឥណ្ឌូនេស៊ី ៖ ប្រទេសចិនបានចោទប្រកាន់ឥណ្ឌូនេស៊ីកាលពីថ្ងៃអាទិត្យថា បានបាញ់ទៅលើអ្នកនេសាទរបស់ខ្លួននិងបង្ករបួសដល់អ្នកនេសាទម្នាក់នៅក្នុងការផ្ទុះភាពតានតឹងថ្មីរវាងប្រទេសទាំងពីរ ក្នុងសមុទ្រចិនខាងត្បូង។
ក្រសួងការបរទេសនៅទីក្រុងប៉េកាំងបានចាប់ផ្តើមធ្វើការតវ៉ាយ៉ាងខ្លាំងទៅលើអ្វីដែលខ្លួនបានហៅថាជាការរំខានយាយីរបស់កងទ័ពជើងទឹកឥណ្ឌូនេស៊ីលើអ្នកនេសាទចិន។
ក្រសួងបាននិយាយថា នាវាទាហានជើងទឹករបស់ប្រទេសឥណ្ឌូនេស៊ីជាច្រើនគ្រឿងបានបើកការបាញ់ប្រហារទៅលើទូកនៅក្នុងដែននេសាទដែលមានជម្លោះកាលពីថ្ងៃសុក្រ។ក្រសួងបានបន្តថា នាវិកម្នាក់បានរងរបួសខណៈពេលដែលទូកនេសាទនិងនាវិកចំនួនប្រាំពីរនាក់ទៀតត្រូវបានឃុំខ្លួន។
អ្នកនាំពាក្យក្រសួងលោកស្រី Hua Chunying បាននិយាយនៅក្នុងសេចក្តីថ្លែងការណ៍មួយថា “ប្រទេសចិនបានប្រឆាំងជំទាស់យ៉ាងខ្លាំងនិងថ្កោលទោសចំពោះការប្រើប្រាស់កម្លាំងហួសកំរិតបែបនេះ”។ លោកស្រីបាននិយាយថា ឧប្បត្តិហេតុនោះបានកើតឡើងនៅក្នុងដែននេសាទរបស់ចិនដែលជាកន្លែងប្រទេសទាំងពីរបានទាមទារដែនសមុទ្រត្រួតស៊ីគ្នា។
លោកស្រី Hua បានបន្តថាសកម្មភាពរបស់ឥណ្ឌូនេស៊ីបានរំលោភលើច្បាប់អន្ដរជាតិ។ប្រទេសចិនជំរុញឲ្យឥណ្ឌូនេស៊ីត្រូវបញ្ឈប់ការធ្វើសកម្មភាពដែលបង្កភាពតានតឹង បង្កបញ្ហាឬប៉ះពាល់ដល់សន្តិភាពនិងស្ថិរភាព ។
ជាមួយគ្នានោះ កងទ័ពជើងទឹករបស់ឥណ្ឌូនេស៊ីបានបញ្ជាក់ពីឧប្បត្តិហេតុនេះនៅក្នុងសេចក្តីថ្លែងការណ៍មួយដោយនិយាយថា នាវាមានទង់ជាតិចិនត្រូវបានឃាត់ទុកប៉ុន្តែគ្មាននរណាម្នាក់ ត្រូវបានបង្ករបួសស្នាមទេ។
កងទ័ពជើងទឹកបាននិយាយថា ខ្លួនបានស្ទាក់ចាប់នាវាបរទេសដែលនេសាទដោយខុសច្បាប់ ចំនួន១២គ្រឿងដែលគេចខ្លួនខណៈនាវាចម្បាំងបានចូលទៅជិត។ សេចក្តីថ្លែងការណ៍បាននិយាយថា នាវាកងទ័ពជើងទឹកបានតាមរកនិងបានបាញ់ព្រមានជាច្រើនលើករហូតដល់នាវាចិនត្រូវបានគេបញ្ឈប់។
កាលពីខែមុន ទីក្រុងប៉េកាំងបានធ្វើការតវ៉ាយ៉ាងខ្លាំងបន្ទាប់ពីកងទ័ពជើងទឹកឥណ្ឌូនេស៊ីបានរឹបអូសទូករបស់ចិននៅក្នុងដែនទឹកក្បែរកោះ Natuna របស់ប្រទេសឥណ្ឌូនេស៊ីដែលបានចោទប្រកាន់ថាបាននេសាទខុសច្បាប់៕
