ភ្នំពេញៈ មន្ត្រីយោធាម្នាក់ នៅអង្គភាពភូមិភាគ៣ ត្រូវកងកម្លាំងកងរាជអាវុធហត្ថបញ្ជាការដ្ឋានខេត្តកំពត ចាប់វាយខ្នោះ នាព្រឹកថ្ងៃទី១៨ ខែមិថុនា ឆ្នាំ២០១៦ យកទៅតុលាការទាក់ទងនិងការបើកឡានដឹកឈើប្រណិតលើសទម្ងន់បង្កឲ្យបាក់ស្ពានដែកមួយកន្លែងដែលថស្ថិតនៅភូមិជ័យសេនា ឃុំកោះស្លា ស្រុកឈូក ខេត្តកំពតក្រោយពីសមត្ថកិច្ចស្រាវជ្រាវរកឃើញម្ចាស់ឡាននិងឈ្មួញឈើរួចមក។
មន្ត្រីយោធារូបនោះមានឈ្មោះជឿន ថេង ភេទប្រុស អាយុ៣៧ឆ្នាំ មុខរបរជាមន្ត្រីយោធាភូមិភាគ៣ មានទីលំនៅបច្ចុប្បន្នភូមិផ្សារកន្ទួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺព្រះរាជអាជ្ញាអមសាលាដំបូងខេត្តកំពត លោក ឯក ឆេងហួត បានប្រាប់អ្នកកាសែតថា៖ ការអនុវត្តនីតិវិធីរបស់មន្ត្រីអាវុធហត្ថខេត្តកំពតនោះ គឺធ្វើឡើងដោយខ្លាចមន្ត្រីយោធាខាងលើ មានការរើបម្រះ ឬតដៃជាមួយសមត្ថកិច្ច ព្រោះគាត់មានកាំភ្លើង។ ម្យ៉ាងទៀត លោកព្រះរាជអាជ្ញាបញ្ជាក់ថា ខ្លាចមន្ត្រីយោធារូបនោះ គេចវេស មិនចូលខ្លួនតាមដីការបស់តុលាការឲ្យចូលទៅបង្ហាញខ្លួននៅទីបញ្ជាការដ្ឋានកងរាជអាវុធហត្ថខេត្តកំពត។
គួរជម្រាបថា កាលពីយប់ថ្ងៃទី១១ ខែមិថុនា ឆ្នាំ២០១៦ មានករណីរថយន្តដឹកឈើរបស់មន្ត្រីយោធាភូមិភាគ៣ម្នាក់ បើកឆ្លងកាត់ស្ពានបានធ្វើឲ្យបាក់ស្ពានដែកមួយកន្លែង ដែលស្ថិតនៅភូមិជ័យសេនា ឃុំកោះស្លា ស្រុកឈូក ខេត្តកំពត។ រថយន្ដដឹកឈើប្រណិតនោះម៉ាក ហ្វ៊ុយស៊ូ (FUSO) ពាក់ស្លាកលេខ តាកែវ ៣A-១១៨៧ ជាកម្មសិទ្ធិរបស់ឈ្មោះ ជឿន ថេង ភេទប្រុស អាយុ៣៧ឆ្នាំ មុខរបរជាមន្ត្រីយោធាភូមិភាគ៣ មានទីលំនៅបច្ចុប្បន្នភូមិផ្សារកន្ទួត ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
ក្រោយមានប្រតិកម្មយ៉ាងខ្លាំងពីសំណាក់អភិបាលខេត្តកំពតលោកសាយសំអាល់រដ្ឋមន្ត្រីក្រសួងបរិស្ថាននិងលោកស៊ុនចាន់ថុលរដ្ឋមន្ត្រីក្រសួងសាធារណៈការនិងដឹកជញ្ជូន ទើបអយ្យការអមសាលាដំបូងខេត្តកំពត នៅថ្ងៃទី១៦ ខែមិថុនា ឆ្នាំ២០១៦ ចេញដីកាលេខ ០៦អ.យ.ក/១៦ បញ្ជាឲ្យឈ្មោះ ជឿន ថេង ភេទប្រុស អាយុ៣៧ឆ្នាំ ជាមន្ត្រីយោធាភូមិភាគ៣ ឲ្យចូលបង្ហាញខ្លួននៅទីបញ្ជាការដ្ឋានកងរាជអាវុធហត្ថខេត្តកំពត ដើម្បីស្ដាប់ចម្លើយរឿងធ្វើឲ្យខូចខាតទ្រព្យសម្បត្តិសាធារណៈ ដែលតាមដីកានេះ បានទុករយៈពេល១ខែ ឲ្យមន្ត្រីយោធារូបនេះចូលខ្លួនបំភ្លឺ នេះបើតាមប្រភពពីតុលាការ ហើយគេមិនទាន់ដឹងថាតើអ្នកណាជាម្ចាស់ឈើនោះនៅឡើយទេ។
ពីរថ្ងៃបន្ទាប់ ពោល គឺនៅព្រឹកថ្ងៃទី១៨ ខែមិថុនា ឆ្នាំ២០១៦នេះ កងកម្លាំងកងរាជអាវុធហត្ថខេត្តកំពត ក៏បានធ្វើការឃាត់ខ្លួនមន្ត្រីយោធាខាងលើ ដោយចាប់គ្រៀកដៃវាយខ្នោះមកក្រោយ រួចញាត់ចូលរថយន្តយកទៅសាកសួរនៅទីបញ្ជាការដ្ឋានខេត្តតែម្ដងុ។
ប្រជាពលរដ្ឋរង់ចាំមើលថាតើរឿងនេះអាចរួចពីសំណាញ់ច្បាប់បានដែររឺទេ ព្រោះជាទូទៅអ្នកមានលុយរំលោភច្បាប់ដូចចេះតែរួចខ្លួន៕
