កាលពីសប្តាហ៍កន្លងមក ក្នុងឧកាសបំពេញទស្សនកិច្ចទៅកាន់ទីក្រុងប៉េកាំង អធិការបតីអាល្លឺម៉ងលោកស្រី Angela MerKel បង្ហាញពីការព្រួយបារម្ភស្តីពីវិវាទនៅដែនសមុទ្រចិនភាគខាងត្បូង ដោយលោកស្រីបានស្នើរឲ្យមានកិច្ចពិភាក្សាដើម្បីបញ្ចប់ភាពតានតឹងទាំងកិច្ចពិភាក្សាពហុភាគី។
អគ្គរដ្ឋទូតចិនប្រចាំនៅតំបន់អឺរ៉ុបលោកស្រីYang Yan Yi បញ្ចាក់ថា នេះជាវិវាទស្តីពីអធិបតេយ្យភាពពាក់ព័ន្ធនិងផលប្រយោជន៍របស់ចិន មិនស្ថិតនៅក្នុងក្រមខ័ណ្ឌអង្គការសហប្រជាជាតិ ឬច្បាប់ស្តីពីដែនសមុទ្រនោះឡើយ ដូច្នេះសូមប្រទេសអឺរ៉ុបមិនត្រូវលូកដៃចូលក្នុងវិវាទនោះឡើយ។
អគ្គរដ្ឋទូតចិនបញ្ជាក់ទៀតថា អឺរ៉ុបគួរតែរក្សាជំហរនៅកណ្តាលនៅក្នុងវិវាទ ដោយផ្តោតទៅលើការការពារសន្តិសុខនៅតាមដែនសមុទ្រ ដូចជាការទប់ស្កាត់ចោរសមុទ្រជាដើម។ លោកស្រី យី ក៏បានចោទប្រកាន់អាមេរិកថា កំពុងតែធ្វើឲ្យមានភាពតានតឹងនៅសមុទ្រចិនភាគខាងត្បូងកាន់តែខ្លាំងឡើង។
នៅក្នុងដំណើរទស្សនកិច្ចទៅកាន់ប្រទេសចិននាពេលកន្លងមក អធិកាបតីអាល្លឺម៉ង់ Angela Merkel- លោក Li Keqiang នាយករដ្ឋមន្ត្រីចិន បានប្រកាសជាថ្មីទៀត ថាចិននៅតែបន្តការទាមទារឲ្យសហភាពអ៊ឺរ៉ុប ផ្តល់ឱ្យចិននូវលក្ខន្តិកៈសេដ្ឋកិច្ចទីផ្សារនៅមុនដំណាច់ចុង ឆ្នាំ២០១៦នេះ។
កាលពីខែមុន សភាអឺរ៉ុប បានប្រឆាំងចំពោះការទទួលស្គាល់លក្ខន្តិកៈចិន ជាសេដ្ឋកិច្ចទីផ្សារ។ សេដ្ឋកិច្ចទីផ្សារនេះ គឺជាលក្ខន្តិកៈមួយដែលសហភាពអឺរ៉ុប បានសន្យាផ្តល់ឲ្យទីក្រុងប៉េកាំងនៅដំណាច់ឆ្នាំ២០១៦ តែដាក់កំហិតឲ្យចិន គោរពចំពោះលក្ខខណ្ឌរបស់សហភាពអឺរ៉ុបដែលទាមទារឲ្យប៉េកាំងធ្វើកំណែ ទម្រង់រចនាសម្ព័ន្ធសេដ្ឋកិច្ចរបស់ខ្លួន។ សូមជំរាបថា ចិនបានចូលជាសមាជិកនៃអង្គការពាណិច្ចកម្មពិភលោកក្នុងឆ្នាំ២០០១។
សម្រាប់ អឺរ៉ុប ការផ្តល់លក្ខន្តិកៈសេដ្ឋកិច្ចទីផ្សារឲ្យដល់ចិននឹងធ្វើឲ្យអឺរ៉ុប លែងមានសិទ្ធិក្នុងការដាក់កំហិតលើការនាំទំនិញចិនចូលមកកាន់ សហភាពអឺរ៉ុបទៀតឡើយ។ម្យ៉ាងទៀត បញ្ហាស្តីពីការប្រគល់លក្ខន្តិកៈសេដ្ឋកិច្ចទីផ្សារចិននេះ នឹងត្រូវស្នងការអឺរ៉ុបលើកយកមកពិភាក្សាគ្នាជាថ្មីម្តងទៀតនៅចុង ខែមិថុនា ឬមួយក៏នៅខែកក្កដាក្រោយ។
ចំណែកទីក្រុង ប៉េកាំងវិញ បានវាយតម្លៃថា”ការទទួលស្គាល់លក្ខន្តិកៈនេះគឺ ដោយសារតែ ចិនបានចូលទៅក្នុងអង្គការពាណិជ្ជកម្មពិភពលោកអស់រយៈពេលដប់ប្រាំ ឆ្នាំមកហើយ”។
ស្របគ្នានេះដែរ នាយករដ្ឋមន្ត្រីចិនលោក លីគឺឈាំង បានថ្លែងបញ្ជាក់ដែរថា ចិន ក៏មិនចង់ធ្វើសង្គ្រាមពាណិជ្ជកម្មណាមួយឡើយ ពីព្រោះវានឹងមិនផ្តល់ផលប្រយោជន៍ឲ្យដល់ នរណាមួយឡើយ៕
