ខេត្តសៀមរាប៖ ឧកញ៉ា ទូច សៀ កំពុងតែល្បីល្បាញ លេចធ្លោនៅក្រុងសៀមរាប ដោយសារយក ផ្លូវជាតិលេខ៦A នៅចំណុចបូរីសៀងណាំ និងទីតាំងផ្សេងៗជាច្រើនទៀត សម្រាប់ ធ្វើអាជីវកម្មទារប្រាក់ ពីក្រុមរថយន្តតាក់ស៊ី ព្រមទាំងរថយន្តក្រុងផងដែរ ។
អ្នកបើកបររថយន្តតាក់ស៊ីបាននិយាយតៗគ្នាថា៖ មានឧកញ៉ា មួយរូបនេះ ដែលទើបល្បី ឈ្មោះ នារដូវ កាលថ្មីនេះ បានអង្គុយ កើបលុយ យ៉ាងត្រជាក់ តាមរយៈ បង្កើត បេនឡាន អនាធិបតេយ្យ នៅក្រុង ទេសចរណ៍អង្គរ-សៀមរាប ។
បច្ចុប្បន្ន ទីក្រុងសៀមរាប ថ្នាក់ដឹកនាំបានរៀបចំ តុបតែងលម្អគ្រប់បែបយ៉ាង ប៉ុន្ដែត្រូវបាន បង្កភាព រញ៉េរញ៉ៃយ៉ាងខ្លាំង ទៅវិញ ដោយសាតែ ការបង្កើត បេនចំណត តាក់ស៊ី របស់លោក ឧកញ៉ាទូច សៀ ទៅវិញ ។ បេនក្រៅច្បាប់តាមផ្លូវ របស់ឧកញ៉ា ខាងលើបាន បង្កឱ្យ មាន ហានិភ័យផ្សេងៗដូចជា ការកកស្ទះចរាចរ គ្រោះថ្នាក់ចរាចរ ពិសេសមានការ ប្រទាញប្រទង់ រហូត គ្រោះថ្នាក់ ដល់ភ្ញៀវទៀតផង ។
ជិតមួយឆ្នាំ កន្លងមកអភិបាលក្រុងសៀមរាបបាន កំណត់បេនរថយន្ត នៅក្នុងបុរី សៀងណាំ ស្ថិតក្នុងសង្កាត់ជ្រាវ ក្រុង សៀមរាប សម្រាប់រថយន្តឈ្មួល គ្រប់ប្រភេទ ដើម្បីឱ្យ លោកឧកញ៉ា ទូចសៀ ជាអ្នកគ្រប់គ្រង ។ ប៉ុន្តែចំណាត់ការរៀបចំ របស់សាលាក្រុង មិនមាន ប្រសិទ្ធភាពទាល់តែសោះ ។ លោក សូរ ប្លាតុង អភិបាលក្រុងខិតខំ ប្រឹងប្រែងរៀបចំ ! រីឯ លោក ឧកញ៉ា ទូច សៀ វិញ ខិតខំបង្កើតឱ្យមាន បេនឡានតាក់ស៊ី អនាធិបតេយ្យ ច្រើនកន្លែង ទៅវិញ ។ បើរាប់ត្រឹមផ្លូវជាតិលេខ៦ មួយ ខ្សែ ចាប់ពីស្ពានថ្ម ព្រះរាជដំណាក់ ទៅដល់មុខផ្លូវ ចូល ទៅបុរីសៀងណាំ មាន រហូតដល់ទៅ ៨ កន្លែង ចុះផ្លូវផ្សេងៗទៀត តើមានប៉ុន្មាន កន្លែង ទៀតទៅ ដូចនេះក្នុង ក្រុង-សៀមរាប ទាំងមូល មិនតិច កន្លែងនោះទេ ។
មហាជននិយាយថា៖ បក្ខពួកនិង កូនចៅរបស់ លោកឧកញ៉ាខាងលើ មានច្រើនណាស់ ក្នុងនោះមាន ប៉ូលិស និង ប៉េអឹមផងដែរ ។ ក្រុមអ្នករត់តាក់ស៊ីបាននិយាយថា៖ ពេលបានម៉ូយ ពេញឡាន រៀប ចេញ ត្រូវបង់ក្បាលឡាន ៧.០០០ រៀល សម្រាប់ ប្រភេទ ឡានតូច តែអ្វីដែលឆ្ងល់ ខ្លាំងនោះ គឺ (បង់កាង) ១០.០០០ រៀល បើមិនបង់ មិនឱ្យចេញ ។ ក្រុមតាក់ស៊ីរអ៊ូថា៖ ស្អីទៅ កាងនោះ ខ្ញុំរត់ចាប់ម៉ូយ ដោយខ្លួនឯងសោះ ប៉ូលិសមិនឆ្លើយទេ ! តែអ្នករត់តាក់ស៊ីដែល គេដឹងឆ្លើយថា កាង នោះគឺការពារ ហ្នឹងឯង ។
មហាជនរិះគន់ថា៖ លោកឧកញ៉ា ទូច សៀ បង្កើតបេនរថយន្ត តាមថ្នល់ក្រៅច្បាប់ ដើម្បីអង្គុយ កើបលុយនេះ មិនដឹងថា អភិបាល ខេត្ដសៀមរាប បានជ្រាប ឬយ៉ាងណានោះទេ ឫមួយពួកគេ ត្រូវរ៉ូវគ្នា បើកភ្លើងខៀងឱ្យធ្វើអញ្ចឹង បានជាដំណើរការបានយ៉ាងរលួនបែបនេះ ៕
