ឧត្តរមានជ័យ៖ សកម្មភាពប្រេងសាំង នាំចូលពីប្រទេសថៃ តាមមាត់ច្រករបៀងជប់គគីរ មកទឹកដីកម្ពុជា ដែលគេបាន អះអាងថា ជាប្រេងនាំចូលដោយមានច្បាប់ សំរាប់ចែកចាយប្រើប្រាស់ នៅក្នុងខេត្ត ។ ក៏ប៉ុន្តែប្រេងទាំងនោះ មិនត្រឹមតែតែជ្រកក្រោមស្លាកសញ្ញានាំចូលចែកចាយ ក្នុងស្រុកតែប៉ុណ្ណោះទេ បានដឹកបន្ត យកទៅចែកចាយនៅតាមដេប៉ូនានា នៅខេត្តផ្សេងទៀត ។
ការនាំចូលប្រេងពីថៃតាមច្រកបៀងជប់គគីរ ត្រូវបានដឹកយកទៅស្តុកទុកនៅឃ្លាំងមួយកន្លែង នៅជើងភ្នំដងរែក ព្រំដែនកម្ពុជា-ថៃ ស្ថិតក្នុងភូមិចាន់ក្រហមសែនជ័យ ឃុំអំពិល ស្រុកបន្ទាយអំពិល ខេត្តឧត្តរមានជ័យ ។
អ្នកគ្រប់គ្រងឃ្លាំងឈ្មោះ សួន ដារា បានប្រាប់ថា៖ ជាប្រេងនាំចូល ក្រោមលិខិតអនុញ្ញាត ប្រើប្រាស់ នៅក្នុងខេត្ត តែមិនបានបញ្ជាក់ពី ការនាំចូលប្រេងសាំង និងប្រេងម៉ាស៊ូត ពីប្រទេសថៃ ! មានប៉ុន្មានរថយន្ត ក្នុងមួយ ថ្ងៃៗនោះទេ ។ ចំពោះការអះអាងពីអាជ្ញាប័ណ្ណនាំចូលប្រេងពីថៃ ខាងលើ ហាក់ដូចជាមានការលាក់លៀម ព្រោះថា ! រថយន្តដឹកប្រេងសាំង ថៃ ត្រូវបាននាំចូល រាប់សិបគ្រឿង ក្នុងមួយខែៗ ផ្ទុយពីការរៀបរាប់ របស់ ប្រជាពលរដ្ឋ រស់នៅក្បែរមាត់ច្រក ! ពួកគាត់បានប្រាប់ថា៖ គេសង្កេតឃើញរថយន្តថៃ ដឹកប្រេងចូលក្នុងទឹកដីកម្ពុជា ជារៀងរាល់ថ្ងៃ ក្នុង១ថ្ងៃចំនួន ២ រថយន្ត ។
អ្នកព័ត៌មានបានឃើញ រថយន្តកម្ពុជា ជាច្រើនគ្រឿងចាំដឹកបន្ត ពីឃ្លាំងស្តុកខាងលើ ទៅចែកចាយនៅ តាម ដេប៉ូ ក្នុងខេត្តផ្សេងៗ ដែលផ្ទុយទៅ នឹងអាជ្ញាប័ណ្ណ ។ ដោយឃើញបញ្ហានេះអ្នកព័ត៌មាន បានទំនាក់ទំនងតាម ទូរស័ព្ទទៅលោក ខាន់ ផល្លា អនុប្រធានគយខេត្ត ទទួលបន្ទុកគយចល័ត នៅព្រឹកថ្ងៃទី១១ ខែមិថុនា ឆ្នាំ២០១៦ នេះថា៖ ប្រេងដែលនាំចូលប្រើប្រាស់ក្នុងស្រុក ក្នុងមួយខែៗ នាំចូលប្រេងពី ២០ ទៅ ៣០រថយន្ត លោកគ្រាន់តែ ចេញ ឯកសារ បង្កាន់ដៃ ស្តុកនាំចូលប៉ុណ្ណោះ បញ្ហាបង់ពន្ធ គឺស្ថិតនៅលើនាយកដ្ឋានរដ្ឋាករ ។ ប៉ុន្តែលោក មិន បានបញ្ជាក់ ពីសកម្មភាពប្រេងដឹកបន្តទៅចែកចាយនៅតាមបណ្តាខេត្តផ្សេងៗដែរ ! គ្រាន់តែលោកប្រាប់ថា គឺជារឿងថ្នាក់លើនោះទេ ។
មតិមហាជននិយាយថា៖ ការនាំចូលប្រេងឆ្លងដែនយកទៅចែកចាយបន្ត នៅខេត្តផ្សេងៗនោះ វាច្រើនជាង កំរិតបរិមាណប្រើប្រាស់ នៅក្នុងខេត្តឧត្តរមានជ័យខ្លាំងណាស់ សកម្មភាពដឹកប្រេងបានរលួនបែបនេះ ដោយសារ តែត្រូវ រ៉ូវ គ្នាជាមួយមន្ត្រីស្ថាប័នពាក់ពន្ធ័ និងមន្ត្រីជំនាញ នៅក្នុងខេត្ត ! ទង្វើនេះបានធ្វើឱ្យបាត់ប្រាក់ចំណូលរដ្ឋ ។
គួរបញ្ជាក់ដែរថា នៅពេល អ្នកព័ត៌មាន ថតយករូបភាព សកម្មភាពរថយន្តថៃដឹកប្រេងសាំង នាំចូលក្នុង ទឹកដីកម្ពុជា ! នៅមាត់ច្រករបៀងជប់គគីរនោះ ! មានរថយន្តម៉ាកឡុងគ្រីស័រ ពណ៌ស្លែរចាស់ ពាក់ស្លាក់លេខ ភ្នំពេញ ២M ៤៤៣៤ របស់លោក សួន ដារា បើករថយន្ត តាមបិទមិនឱ្យថតយករូបភាពនោះឡើយ ៕
