ខេត្តស្ទឹងត្រែង៖ បន្ទាប់ពីការឃាត់ទុករថយន្តដឹកខ្សាច់ចំនួន៩គ្រឿង របស់កងវិស្វកម្មតេជោ ហ៊ុនសែន សៀមរាប អស់រយៈពេល១យប់ ដើម្បីរង់ចាំដំណោះស្រាយនោះ នៅវេលារសៀលថ្ងៃទី០៦ ខែមិថុនា ឆ្នាំ២០១៦ សាច់ប្រាក់សុទ្ធចំនួន ២៩ ៣៤៦ ០០០រៀល ត្រូវបាន នាយ ខេង សុមេធ មេបញ្ជាការ កង វិស្វកម្មតេជោ ហ៊ុនសែន សៀមរាប នាំយកទៅបង់ជូនមន្រ្តីសមត្ថកិច្ចស្ថានីយថ្លឹងយានយន្ត ដែល បាន ដាក់តាំងនៅក្នុងភូមិសាស្រ្តឃុំ សំអាង លើបណ្តោយផ្លូវជាតិលេខ៩
ស្រុកថាឡាបរិវ៉ាត់ ខេត្តស្ទឹងត្រែង ។
បើតាមការរៀបរាប់របស់អ្នកបើកបររថយន្តដឹកខ្សាច់របស់កងវិស្វកម្មតេជោ ហ៊ុនសែន សៀមរាប បានឲ្យដឹងថា៖ ក្បួនរថយន្តដឹកខ្សាច់ទាំង៩គ្រឿងនេះ ត្រូវបានសមត្ថកិច្ចជំនាញ ស្ថានីយថ្លឹងយាន យន្ត (សំអាង) ធ្វើការឃាត់ទុក នៅវេលាថ្ងៃត្រង់ ថ្ងៃទី០៥ ខែមិថុនា ជាមួយនឹងរថយន្តដឹកខ្សាច់ពីរ បី គ្រឿងផ្សេងទៀត ផងដែរ ខណៈពេលដែលកងរថយន្តនេះ បំពេញបេសកម្មដឹកជញ្ជូនខ្សាច់ ចេញពី ក្រុង ស្ទឹងត្រែង បំណងឆ្ពោះទៅកាន់ការដ្ឋានអភិវឌ្ឍន៍តំបន់ព្រំដែន (មុម៣) នៃភូមិសាស្រ្តខេត្ត ព្រះវិហារ ។ ក្រុមអ្នកបើកបរនៃកងវិស្វកម្មតេជោ បានបញ្ជាក់ថា៖ ពួកគាត់បានផ្ទុកចំនួនខ្សាច់លើ រថយន្ត សមល្មម និងទ្រុងឡាន មិនហ៊ានដាក់លើសទ្រុងឡានឡើយ ហើយទ្រុងឡាន នោះទៀតសោត គឺទ្រុងឡានដើម មិនមានការកែច្នៃនោះឡើយ ។
មន្រ្តីសមត្ថកិច្ចជំនាញស្ថានីយថ្លឹងរថយន្តនោះ បានបំភ្លឺឲ្យដឹងថា៖ រថយន្តដឹកខ្សាច់ទាំងនោះ បានផ្ទុកដឹកជញ្ជូនខ្សាច់លើសទម្ងន់ដែលច្បាប់បានកំណត់ ។ សមត្ថកិច្ចជំនាញនៅទីនោះ បានបញ្ជាក់បន្ថែមថា រថយន្តដឹកជញ្ជូនប្រភេទភ្លៅ៤ គឺត្រូវបានច្បាប់អនុញាតិឲ្យ ដឹកជញ្ជូនផ្ទុកទម្ងន់បាន ៣០តោន រួមទាំងទម្ងន់រថយន្តផងដែរ ។
បើយោងតាមលទ្ធផលនៃការថ្លឹងយានយន្តទាំង៩គ្រឿងនោះ និងផ្អែកតាមច្បាប់កំណត់ ដែល មានទំហំនៃការផាកពិន័យក្នុងទម្ងន់លើ ១តោន គឺស្មើនឹង ៣០ម៉ឺនរៀល សារុបការបង់ពិន័យនោះ គឺស្មើនឹង ជិត ៣០លានរៀល ។ បន្ទាប់ពីការថ្លឹងយានយន្តទាំងនោះរួចហើយ ខ្សាច់ដែលនៅ លើ រថយន្តទាំងនោះ ក៏ត្រូវចាក់ទម្លាក់ចោលនៅជិតស្ថាននីយត្រួតពិនិត្យ ថ្លឹងយានយន្តនោះផងដែរ មុនវិលត្រឡប់ទៅកាន់ការដ្ឋានវិញ ។
នាយឧត្តមសេនីយ៏ ខេង សុមេធ មានប្រសាសន៍ថា៖ ការគោរព អនុវត្តច្បាប់ នាំមកនូវសេក្តីថ្លៃថ្នូរ ! ការទទួលស្គាល់កំហុសរបស់ខ្លួន វាជាការបង្ហាញនូវភាពស្មោះត្រង់ និងជាតម្លៃមួយ ឆ្លុះបញ្ចាំងមនសិការនៃការចូលរួមពង្រឹងការអនុវត្តច្បាប់ ពង្រឹងនីតិរដ្ឋ ។
នាយ ខេង សុមេធ បន្តថា លោកគាំទ្រទាំងស្រុងចំពោះចំណាត់ការដ៏មានប្រសិទ្ធិភាពនេះ ហើយលោកបានបញ្ជាក់បន្ថែមថា៖ បើសិនជាចំណាត់ការដ៏ក្តៅគគុកនេះ ត្រូវបានអនុវត្តប្រកប ដោយ តម្លាភាពនៃអ្នកអនុវត្តច្បាប់ទៅលើអ្នកមិនគោរពច្បាប់ ផ្លូវ-ថ្នល់-ស្ពាន ដែលជា សសៃ ឈាម សេដ្ឋកិច្ចជាតិ មិនត្រូវបានប្រឈមជាមួយនឹងការខូចខាតដោយសារតែការដឹកជញ្ជូន លើសទម្ងន់ ទៀតឡើយ ។ ជាមួយគ្នានោះ លោកបានសំណូមពរ សូមឲ្យមានការរៀបចំស្ថាននីយ៍ថ្លឹង យានយន្ត (សំអាង)មួយនេះ ឲ្យមានស្តង់ដារ ត្រឹមត្រូវជាមុនសិន ដើម្បីបានផ្តល់ភាព យុត្តិធម៌ជូន អតិថិជនអ្នកដឹកជញ្ជូន ព្រោះការផាកពិន័យនេះ គឺរាប់ភ្នែកជញ្ជីងយកលុយពីប្រជាជន ។
អ្នកបើកបររថយន្តដឹកដីខ្សាច់ ដែលត្រូវបានឃាត់ទុកជាមួយរថយន្តកងវិស្វកម្មតេជោ ហ៊ុនសែន សៀមរាប បានលួចខ្សឹបប្រាប់អ្នកយកព័ត៌មានថា៖ ស្ថានីយថ្លឹងយានយន្តមួយនេះ មិនមែនជា ស្ថានីយ អចិន្ត្រៃយ៍នោះទេ ជួនឃើញ ! ជួនកាលទៀត អត់ មានការត្រួតពិនិត្យនោះទេ ។ ប្រភពដដែលបានឲ្យដឹងទៀតថា៖ កន្លងមក ពេលដឹកខ្សាច់ឆ្លងកាត់ទីនេះ ក្នុង១ជើង បង់ជូន១០ដុល្លា គឺមិនបាច់ថ្លឹងទេ ! មន្រ្តីជញ្ជីងទាំងនោះយកលុយ ដាក់ ហោប៉ៅ ដើម្បីអភិវឌ្ឍន៍ សង្គមគ្រួសារ ផ្ទាល់ខ្លួន របស់ពួកគេឲ្យមានការរីកចម្រើនជាងមុនហើយមើលទៅ ៕
