ខេត្តកំពង់ធំ ៖ បឹងព្រៃប្រស់ កំពុងតែធ្លាក់ក្នុងកណ្ដាប់ដៃឈ្មួញ ដាក់គ្រឿងចក្រឈូសឆាយចាក់ដីរំលោភយកចំណីស្ទឹង ដែលជាបឹងធម្មជាតិនេះ ទៅធ្វើជាកម្មសិទ្ធិផ្ទាល់ខ្លួន ដើម្បី សាងសង់ជាកន្លែង លក់ម្ហូបអាហារ ដោយមិនខ្វល់ពីការ កែលម្អរ និង អភិរក្ស បឹងព្រៃប្រស់របស់រាជរដ្ឋាភិបាល នោះឡើយ ។
ប្រជាពលរដ្ឋ បានសម្ដែងនូវការសោកស្ដាយយ៉ាងខ្លាំង ខណៈពេលដែលរមណីយដ្ឋាន ធម្មជាតិតាំងពីដូនតា មួយនេះ ត្រូវបានរំលោភយក ពីសំណាក់ លោក លឹម ហេង ដោយផ្អែកទៅ លើ លិខិត កាន់កាប់ដែលចេញដោយអាជ្ញាធរ និងជំនាញពាក់ព័ន្ធ ។ បឹងព្រៃប្រស់ ធម្មជាតិ ស្ថិតនៅខាងលិចស្ពានព្រៃប្រស់ ឃុំត្បែងស្រុកកំពង់ស្វាយ ខេត្តកំពង់ធំ ។
លោក អ៊ុន បុត្រ អភិបាលស្រុកកំពង់ស្វាយបានឲ្យដឹងថា៖ម្ចាស់គេមានច្បាប់អនុញ្ញាតពីខេត្ត ចំណែកលោកមិនបាន ចុះហត្ថលេខា លើលិខិតកាន់កាប់ ដីបឹងព្រៃប្រស់នេះទេ ! ព្រោះលោកទើបតែមកកាន់តំណែងជាអភិបាលស្រុកកំពង់ស្វាយនេះ រយៈពេលខ្លី ! ចំពោះអ្នកចុះហត្ថលេខាលើដី នេះ គឺលោក អ៊ឹម ថន ជាអភិបាលស្រុក (មុន) ហើយបច្ចុប្បន្នគាត់បានចូលនិវត្តន៍ហើយ ។
លោក អ៊ឹម សុឌីណា ប្រធានមន្ទីររៀបចំដែនដីនគរូបនីយកម្ម សុរិយោ និងសំណង់បានបញ្ជាក់ប្រាប់អ្នកព័ត៌មានថា៖ ដីនេះគេមានច្បាប់អនុញ្ញាត ជាកម្មសិទ្ធិ ដែលទទួលស្គាល់លេខក្បាលដីពីប្រធានមន្ទីរ មុនឈ្មោះ ឌិត ធន តាំងពី ឆ្នាំ ២០០៩ ។
មហាជនបានរិះគន់ថា៖ សោភ័ណភាព និងសម្រស់រមណីយដ្ឋាន ព្រៃប្រស់ ដែលជាបឹងធម្មជាតិត្រូវបានរលាយហិនហោចដោយសារ ឈ្មួញ ឃុប ឃិតគ្នា ជាមួយ អាជ្ញាធរ ។ ទោះជាដីទីតាំងដីខាងលើ ជាដីកម្មសិទ្ធិក៏ដោយ វាបានប៉ះពាល់យ៉ាងធ្ងន់ធ្ងរ ដល់ទិដ្ឋភាព និងសោភ័ណភាពរមណីយដ្ឋាន ដូច្នេះ ក្រសួងទេសចរណ៍ និងអាជ្ញាធរ ខេត្តកំពង់ធំ រួមទាំងមន្ទីរពាក់ព័ន្ធ គួរតែពិចារណាឡើងវិញ ។ ប្រជាពលរដ្ឋពួកគាត់សង្ឃឹមថា៖ថ្នាក់ដឹកនាំជាន់ខ្ពស់ មេត្តាដាក់ទោស ជនប្រភេទនេះផង ។
ពាក់ព័ន្ធករណីយ៍រំលោភដីបឹង អ្នកព័ត៌មានបានសួរទៅ លោក រតនា ទីប្រឹក្សា ឧញ្ញ៉ា លឹម ហេង គ្រុបតាមទូរស័ព្ទថា៖ ឈ្មោះ លឹម ហេង ខាងលើមិនមែនជា ឯកឧត្តម ឧកញ្ញ៉ា លឹម ហេង នាយក ក្រុមហ៊ុន លឹម ហេងគ្រុបនោះទេ ! លោក លឹម ហេង គ្រាន់តែជាឈ្មួញរកស៊ីប៉ុណ្ណោះ ។
ឯកឧត្តម អភិបាលខេត្តកំពង់ធំ បានបញ្ជាក់តាមទូរស័ព្ទនៅវេលាម៉ោង ០៤ និង៥៤នាទី ថ្ងៃទី១៥ ខែឧសភា ឆ្នាំ២០១៦ នេះថា៖ ទីតាំងដីខាងលើ គេមានប្លង់កម្មសិទ្ធស្របច្បាប់ យូរឆ្នាំមកហើយ !ទោះជាយ៉ាងណាក៍អាជ្ញាធរខេត្តមិនអនុញ្ញាតិដែរ ! អាជ្ញាធរខេត្ត បានហាមឃាត់កាលពីឆ្នាំទៅមិញ ម្តងរួចហើយ ដល់ពេលនេះគាត់ បានចាក់ដីបន្តទៀត ប៉ុន្តែខេត្ត បានហាមឃាត់ទៀត ! មិន អនុញ្ញាតិឲ្យគាត់ចាក់ដីបាំងទឹកហូរនោះទេ !អាជ្ញាធរខេត្តបានកំណត់ ទីតាំង ឲ្យ ទៅលោក លឹម ហេង រួចស្រេចទៅហើយ ដោយភ្ជាប់ជាមួយ ទីតាំងសាលារៀន តៗគ្នា ដោយធ្វើយ៉ាងណាកុំឲ្យ ប៉ះពាល់ដល់ ខ្សែរទឹកហូរ ។
ឯកឧត្តមអភិបាលខេត្តបានបញ្ជាក់ថា៖ អ្នកព័ត៌មានសរសេរថា ស្ទឹង បឹង ព្រៃប្រស់ ជាបឹង ធម្មជាតិ កេរ្តិ៍តំណែលពីដូនតា វាមិនពិតនោះទេ ! ដើមឡើយគ្រាន់តែជាទំនប់មួយប៉ណ្ណោះ ៕
