រាជធានីភ្នំពេញ ៖មជ្ឈមណ្ឌលកំសាន្តរ៉ុកកើតមានការបាញ់ប្រហារ វាយតប់គ្នាជាញឹកញាប់ដូចកូវប៊យនៅរដ្ឋតេចសាស់ តែដោយសារមានខ្នងជាឧកញ៉ាធំម្នាក់ ទើបអាជ្ញាធរមិនហ៊ានក្អក និងមិនហ៊ានបិទ ខណៈប្រជាពលរដ្ឋរស់នៅជិតទីនោះមានការព្រួយបារម្ភសុវត្ថិភាពរបស់ខ្លួន។
តាមប្រភពព័តមានឲ្យដឹងថា យុវជនម្នាក់រងរបួស ដោយគ្រាប់កាំភ្លើងរបស់មិត្តភក្តិមួយគ្រាប់ ខណៈពួកគេកំពុងច្រៀងខារ៉ាអូខេ ក្នុងបន្ទប់ នៃក្លិបរ៉ុក ហើយត្រូវបានគេដឹកបញ្ជូនទៅសង្គ្រោះ នៅមន្ទីរពេទ្យរុស្ស៊ីភ្លាមៗផងដែរ។
ហេតុការណ៍ផ្ទុះអាវុធបណ្តាលអោយរងរបួសមិត្តភក្តិនេះ កើតឡើងស្ថិតនៅក្នុងបន្ទប់ខារ៉ាអូខេ នៃមជ្ឈមណ្ឌលកំសាន្តរ៉ុក ស្ថិតនៅសង្កាត់ ទន្លេបាសាក់ ខណ្ឌចំការមន កាលវេលាម៉ោងប្រមាណ៥ភ្លឺ ថ្ងៃទី៦ ខែឧសភា ឆ្នាំ២០១៦។
អ្នករត់ម៉ូតូឌុបនៅមុខរ៉ុកដែលបានដឹងហេតុការណ៏នេះ បានប្រាប់ថា នៅវេលាម៉ោង៥ភ្លឺគេបានឃើញក្រុមក្មេងស្ទាវប្រមាណជា៣ទៅ៤ឡាន បានប៉ះទង្គិចគ្នានៅក្នុងមជ្ឈមណ្ឌលកំសាន្តរ៉ុក ហើយក៏មានការផ្ទុះអាវុធបាញ់ផ្អើលតែម្តងតែមិនអាចចាប់បានជនបង្កនោះទេ។ ក្រោយមកជនរងគ្រោះដែលត្រូវគ្រាប់ត្រូវបានដឹកបញ្ជូនទៅសង្គ្រោះនៅមន្ទីរពេទ្យរុស្ស៊ី។ ក្រោយកើតហេតុគេឃើញសមត្ថកិច្ចមូលដ្ឋានខណ្ឌចំការមន បានធ្វើការតាមដានស្រាវជ្រាវករណីផ្ទុះអាវុធនេះ ។
ប្រជាពលរដ្ឋរិះគន់ថា ការបាញ់គ្នាយ៉ាងសាហាវខាងលើនេះបញ្ជាក់ថា មជ្ឈមណ្ឌលកំសាន្តរ៉ុកមិនមានសុវត្ថិភាពគ្រប់គ្រាន់សម្រាប់ភ្ញៀវដែលទៅកំសាន្តនៅទីនោះឡើយ ហើយ នេះមិនមែនជាលើកទី១នោះឡើយ តែដោយមានបារមីឧកញ៉ាធំ ទើបអាជ្ញាធរមិនហ៊ានប៉ះ គ្រាន់បើតែជាមួយកន្លែងតូចតាចគ្មានខ្នងតែប៉ុណ្ណោះ៕
