ក្រសួងការពារជាតិអាមេរិកបានប្រកាសថា ទីក្រុងប៉េកាំងបានបដិសេដមិនឲ្យ នាវាផ្ទុកយន្តហោះអាមេរិកUSS John C.Stennis ចូលទៅកាន់កោះហុងកុងឡើយ។ អ្នកនាំពាក្យមន្ទីបញ្ចកោណអាមេរិកលោកBill Urban បានប្រកាសឲ្យដឹងថាសំណើចូលទៅកាន់កំពុងផែកោះហុងកុងរបស់នាវាផ្ទុកយន្តហោះអាមេរិកត្រូវបានច្រានចោល ។
ប៉ុន្តែអាមេរិកសង្ឃឹមថានឹងមាននាវាចម្បាំងផ្សេងទៀតអាចចូលទៅកាន់កោះហុងកុងបានក្នុងរយៈពេលខាងមុខ។
សារព័ត៌មានរ៉យទ័របានផ្សាយថា មន្ត្រីការបរទេសចិនប្រចាំនៅកោះហុងកុងបាននិយាយថាការចូលទៅកាន់កោះហុងកុងរបស់នាវាផ្ទុកយន្តហោះអាមេរិកក្នុងពេលនេះមិនសមស្របនោះឡើយ។
សារព័ត៌មានកោះហុងកុងបានដកស្រងសម្តីមន្ត្រីការបរទេសអាមេរិកប្រចាំនៅកោះហុងកុងបានឲ្យដឹងថា នាវាផ្ទុកយន្តហោះUSS John C Stennisមិនទទួលបានការអនុញ្ញាត្តិឲ្យចូលទៅកាន់កំពង់ផែនៃកោះហុងកុងឡើយ ។ មន្ត្រីចិនក៏មិនបានធ្វើការបកស្រាយពីហេតុផលដែលមិនអនុញ្ញាត្តិខាងលើនោះដែរ។
នេះមិនមានជាលើកទីមួយដែលចិនមិនអនុញ្ញាត្តិឲ្យនាវាអាមេរិកចូលទៅកាន់កំពុងផែកោះហុងកុង ។ កាលពីខេវិច្ឆកាឆ្នាំ២០០៧ នាវាផ្ទុកយន្តហោះUSS Kitty Hawkក៏មិនទទួលបានការអនុញ្ញាត្តិឲ្យចូលទៅកាន់កោះហុងកុងនោះដែរ។ នាវាផ្ទុកយន្តហោះUSS John C Stennisមានចំណុះដល់ទៅ103.000តោន មានប្រវែង ៣៣៣ម៉ែត្រ មាននាហ្វឹក៣២០០នាក់ និងយន្តហោះចម្បាំងរាប់សិបគ្រឿងនៅលើនោះ។
កាលពីថ្ងៃទី១៥ខែមេសារដ្ឋមន្ត្រីការពារជាតិអាមេរិកនិងហ្វីលីពីនបានបំពេញទស្សនកិច្ចនៅលើនាវាផ្ទុកយន្តហោះនោះរយៈពេល២ម៉ោង ពេលដែលនាវាUSS John C Stennisនៅមិនឆ្ងាយប៉ុន្មានពីប្រទេសហ្វីលីពីន៕
