រាជធានីភ្នំពេញ ៖យោងតាមលិខិតមួយរបស់ ក្រុមតំណាងរាស្ត្រ គណបក្សសង្គ្រោះជាតិ បានចុះហត្ថលេខាដោយ ស្នើសម្តេចតេជោ ហ៊ុន សែន នាយករដ្ឋមន្ត្រី អនុញ្ញាតឱ្យ លោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ចូលបំភ្លឺផ្ទាល់មាត់នៅរដ្ឋសភា ក្នុងពេលដ៏ខ្លីខាងមុខនេះជុំវិញបញ្ហាមួយចំនួនក្នុងការអនុវត្តការងារ។
លិខិតរបស់តំណាងរាស្ត្រ បក្សប្រឆាំង បញ្ជាក់ថា បញ្ហាដែលក្រុមតំណាងរាស្ត្រ គណបក្សសង្គ្រោះជាតិចង់ឱ្យ លោករដ្ឋមន្ត្រីក្រសួងយុត្តិធម៌បំភ្លឺនោះ រួមមាន ទី១. គោលការណ៍ច្បាប់និងគោលនយោបាយព្រហ្មទណ្ឌរបស់រាជរដ្ឋាភិបាល ពាក់ព័ន្ធនឹងការឃុំខ្លួនជនត្រូវចោទបណ្តោះអាសន្ន គោលការណ៍និងការអនុវត្តជាក់ស្តែងអធិការកិច្ចការឃុំខ្លួន។ ទី២ ការប្តឹងបរិហារ និងអំណាចធ្វើអធិបញ្ជារបស់រដ្ឋមន្ត្រីក្រសួងយុត្តិធម៌ និងទី៣.សំណួរផ្សេងៗមួយចំនួនទៀត ។
សូមរំលឹកថា លោក កឹម សុខា នឹងត្រូរបានតុលាការកោះហៅចូលបំភ្លឺនៅថ្ងៃទី១១ឧសភាខាងមុខនេះ ចំណែកតំណាងរាស្រ្ត២រូបទៀតនឹងត្រូវចូលខ្លួនបំភ្លឺនៅថ្ងៃទី១៦ឧសភា ពាក់ពន្ធ័និងរឿងបារមីស្នេហ៏កឹម សុខា ស្រីមុំ ដែលមានបុគ្គលិកអង្គការអាដហុក៤រូប និងមន្រ្តីគជប១រូបបានជាប់់ឃុំរួចទៅហើយ៕
