ភ្នំពេញ៖កាស៊ីណូរបស់ឧកញ៉ាលីយ៉ុងផាត់ដ៏មានអំណាច នៅខេត្តកោះកុងនិងឧត្តរមានជ័យ ត្រូវបានរាជរដ្ឋាភិបាលអនុញ្ញាត្តឲ្យបើកល្បែងស៊ីសងគ្រប់ប្រភេទ រួមទាំងល្បែងមួយចំនួនដូចជា ល្បែងប្រជល់មាន់ជាដើម ដែលជនបរទេសមិនចេះលេង ហើយមានតែប្រជាពលរដ្ឋខ្មែរចូលចិត្តលេង ចំណែកច្បាប់កម្ពុជាបានហាមមិនឲ្យជនជាតិខ្មែរចូលលេងល្បែងក្នុងកាស៊ីណូឡើយ ទុកសំរាប់តែជនបរទេស ដូច្នេះការចេញសជណខាងលើ បង្ហាញពីភាពមិនប្រក្រតី និងអំពើពុករលួយយ៉ាងច្បាស់ក្រឡែតដូចមើលបាតដៃ។
សេចក្តីជូនដំណឹងលេខ១០៥២សជណចុះថ្ងៃទី១៥ ខែកញ្ញា ឆ្នាំ២០១៥នេះ បានបង្ហាញថា រាជរដ្ឋាភិបាលបានសម្រេចឯកភាព តាមសំណើរបស់ក្រុមហ៊ុន អិលវ៉ាយភី គ្រុប របស់ឧកញ៉ា លី យ៉ុងផាត់ ដោយសុំបើកបន្ថែម ល្បែងភ្នាល់គ្រប់ប្រភេទ រួមទាំងល្បែងប្រជល់បក្សីកីឡា(ជល់មាន់) និងស្លុតម៉ាស៊ីន-ម៉ាស៊ីន អេឡិចត្រូនិចគ្រប់ប្រភេទ តាមការធ្វើអាជីវកម្មសេវាកម្ម ដោយផ្ទាល់ និងតាមរយៈ Internet Online ក្នុងនិងក្រៅប្រទេស ល្បែងកូនហ្គោល ល្បែងប្រណាំងសេះ ល្បែងភ្នាល់បាល់ និងល្បែងភ្នាល់គ្រប់ប្រភេទ ខារ៉ាអូខេ ម៉ាស្សា នៅក្នុងកាស៊ីណូកោះកុង នៅខេត្តកោះកុង និងកាស៊ីណូ អូរស្មាច់ នៅខេត្តឧត្តរមានជ័យ។
បើយោងតាមសេចក្តីជូនដំណឹងនេះ បញ្ជាក់ថាខ្មែរយើងអាចចូលលេងល្បែងច្រើនប្រភេទ ដែលត្រូវបានអនុញ្ញាតនោះរួមមាន៖ ស្លុតម៉ាស៊ីន-ម៉ាស៊ីន អេឡិចត្រូនិចគ្រប់ប្រភេទ តាមការធ្វើអាជីវកម្មសេវាកម្មដោយផ្ទាល់ និងតាមរយៈ Internet Online ក្នុងនិងក្រៅប្រទេស ល្បែងកូនហ្គោល ល្បែងប្រណាំងសេះ ល្បែងប្រជល់បក្សីកីឡា ល្បែងភ្នាល់បាល់ និងល្បែងភ្នាល់គ្រប់ប្រភេទ ខារ៉ាអូខេ ម៉ាស្សា នៅក្នុងកាស៊ីណូកោះកុង ក្នុងខេត្តកោះកុង និងកាស៊ីណូ អូរស្មាច់ ខេត្តឧត្តរមានជ័យ ហើយល្បែងតាមអនឡាញអាចនឹងបើកដោយស្របច្បាប់នៅកណ្តាលក្រុង ក្រោមលេសថាជាសាខារបស់កាស៊ីណូលីយ៉ុងផាត់ ព្រោះថានៅក្នុងសជណនោះមិនបានដាក់បំរាមមិនឲ្យមានវត្តមានជនជាតិខ្មែរចូលលេង និងមិនបានហាមមិនឲ្យបើកសាខានោះឡើយ។
ប្រជាពលរដ្ឋខ្មែរច្បាស់ជាសំរុក ចូលលេងល្បែងក្នុងកាស៊ីណូរបស់លោកឧញ៉ាលីយុងផាត់ ទាំងនៅកោះកុងក៏ដូចជាឧត្តមានជ័យ ហើយអំពើឧក្រិដ្ឋចោរហារយនឹងកើតមានក្នុងសង្គមដោយសារល្បែងស៊ីសងខាងលើ។
កន្លងមកមានតែកាស៊ីណូណាហ្គាតែមួយប៉ុណ្ណោះ ដែលរាជរដ្ឋាភិបាលអនុញ្ញាត្ត បានកើបលុយនៅរាជធានីភ្នំពេញដែលកាស៊ីណូមួយនេះ ក៏បានបើកឲ្យខ្មែរចូលលេងដោយសេរី ទោះបីមានការរិះគន់ក៏សមត្ថកិច្ចធ្វើមិនដឹងដែរ។
ចំណែកនៅតាមព្រុំដែនវិញ ល្បែងដែលរាជរដ្ឋភិបាលអនុញ្ញាតិឲ្យកាស៊ីណូលោកឧកញ៉ាលីយុងផាត់នោះ វាបានកើតរួចទៅហើយនៅតាមកាស៊ីណូផ្សេងៗទៀត ពិសេសល្បែងជល់មាន់ជ្រោកក្រោមផ្លាកកាស៊ីណូ ដូចជាកាស៊ីណូនៅប៉ោយប៉ែត នៅក្រុងព្រះស៊ីហនុ នៅជ្រៃធំជាដើម។
សម្តេចតេជោហ៊ុនសែនបានប្រកាសឲ្យដឹងថា ការបង្កើតកាស៊ីណូនៅតាមព្រុំដែនជាផ្នែកមួយនៃការអភវឌ្ឍន៍ដើម្បីការពារព្រុំដែន ព្រោះកាស៊ីណូតែធ្វើហើយមិនអាចលើកយកទៅវិញបានទេ។តែទន្ទឹមនោះ សម្តេចក៏បានប្រកាសហាមមិនឲ្យមានខ្មែរចូលលេងល្បែងនោះឡើយ ព្រោះខ្លាចមានចលាចលសង្គមដែលរដ្ឋាភិបាលទទួលខុសត្រូវ។
ដូច្នេះនៅពេលឲ្យឧកញ៉លីយុងផាត់បើកកាស៊ីណូមានតាំងពីជល់មាន់ វាដូចជាជួយសម្រួលឲ្យសមត្តកិច្ចនគរបាល និងអាជ្ញាធរដែនដីដែលទទួលខុលត្រូវនៅតាមតំបន់ដែលមានកាស៊ីណូ កាន់តែងាយស្រួលក្នុងការឃុបឃឹតបើកឲ្យខ្មែរចូលលេងល្បែងតាមអំពើចិត្ត។បើដូច្នេះមែននោះ គេគួរតែលុបចោលទៅ នយោបាយភូមិឃុំមានសុវត្ថិភាពព្រោះវាគ្មានប្រសិទ្ធិភាព ក្នុងការអនុវត្តន៍នោះឡើយ។
សូមរាជរដ្ឋាភិបាលពិនិត្យមើលសជណឡើងវិញផង ក្នុងពេលធ្វើកំណែទំរង់់គោលនយោបាយតាមអនុសាសន៏របស់សម្តេចតេជោ បែជាអនុញ្ញាត្តឲ្យបើកល្បែងដែលមានតែខ្មែរចូលលេង តែប៉ុណ្ណោះ។
គេដឹងថា ឧកញ្ញ៉ា លីយ៉ុងផាត់មានអំណាចធំធេងណាស់ ក្នុងការរកស៊ីនៅកម្ពុជា ដូចជាការបើកកាស៊ីណូខាងលើជាដើម៕
